Tveir menn voru sakfelldir og einn sýknaður í Héraðsdómi Reykjavíkur í dag vegna alvarlegrar árásar á mann í bílakjallara við Þórunnartún í Reykjavík aðfaranótt 17. mars síðastliðins.

DV greindi fyrst frá.

Kareem M. M. Abufarhah var dæmdur í fimm ára fangelsi og Mohamed Sayidali Ahmed í 18 mánaða fangelsi. Þriðji maðurinn, Qossay Ali Yahya Alsadi, var sýknaður.

Þremenningarnir höfðu verið ákærðir fyrir tilraun til manndráps. Samkvæmt ákæru óku þeir að brotaþola áður en ráðist var á hann. Kareem var meðal annars sakaður um að hafa ekið Land Rover bifreið á manninn á mikilli ferð en Mohamed um að hafa stungið hann í vinstri rasskinn með óþekktu stunguvopni.

Brotaþoli var í lífshættulegu ástandi eftir árásina og hlaut meðal annars lungnamar á báðum lungum, blóðþurrðarlost og brot á vinstri upphandleggsbeini.