Alma D. Möller, heilbrigðisráðherra, hefur tryggt Landspítala fjárveitingu upp á 48 milljónir króna á þessu ári til kaupa á nýjum og fullkomnum búnaði til klínískrar þjónustu í þyrlum Landhelgisgæslunnar. Markmiðið með kaupunum er að stórefla öryggi sjúklinga og tryggja að viðeigandi tæki séu til staðar þegar bregðast þarf við alvarlegum slysum og bráðveikindum við flutning í lofti.
Hingað til hefur kaup á sjúkrabúnaði í þyrlurnar fyrst og fremst verið fjármagnað með söfnunarfé almennings. Á sama tíma hefur búnaður í sjúkrabílum landsins verið endurnýjaður með stuðningi úr sjúkrabílasjóði Rauða krossins, og ríkið hefur veitt sérstakar fjárveitingar til Sjúkrahússins á Akureyri vegna tækjakaupa í sjúkraflugvélar. Með þessari ákvörðun ráðherra kemst fjármögnun á klínískum búnaði í þyrlunum loks á fast ríkisframlag.
Regluleg endurnýjun tryggð til framtíðar
Ákvörðunin er liður í opinberri aðgerðaáætlun stjórnvalda fyrir sjúkraflutninga og bráðaþjónustu utan heilbrigðisstofnana sem gildir til ársins 2030. Til að koma í veg fyrir að tækin úreldist er gert ráð fyrir árlegu áframhaldandi framlagi strax frá og með næsta ári. Það fjármagn mun mæta afskriftum og tryggja reglulega endurnýjun eftir þörfum.
Það verður hlutverk fagfólks á Landspítala að velja, kaupa og viðhalda búnaðinum þannig að hann virki ávallt sem skyldi. Sams konar fyrirkomulag og ábyrgð hefur reynst vel á Sjúkrahúsinu á Akureyri hvað varðar sjúkraflugið, samkvæmt frétt inn á vef Heilbrigðisráðuneytisins.
Mikilvægt fyrir öryggi sjúklinga og starfsfólks
Alma D. Möller heilbrigðisráðherra leggur ríka áherslu á að tækjakosturinn þurfi að vera í lagi. „Öryggi sjúklinga þarf að vera tryggt eins og kostur er og til þess þarf fagfólkið sem vinnur við flutningana að hafa góðan og viðeigandi búnað. Þetta þekki ég vel af eigin reynslu,“ sagði ráðherra um ákvörðunina, en hún starfaði áður um árabil sem yfirlæknir á gjörgæsludeild og framkvæmdastjóri aðgerðasviðs Landspítala áður en hún varð landlæknir og síðar ráðherra.
