Stærðfræðikennari í Bretlandi hefur verið bannaður frá kennslu eftir að niðurstaða aganefndar var sú að hann hefði að öllum líkindum haft kókaín undir höndum og neytt þess í jólaboði starfsfólks skóla.

Rowan Barnicoat starfaði sem kennari við Pool Academy í Cornwall. Málið á rætur að rekja til jólaboðs í desember 2023 þar sem Barnicoat er sagður hafa tekið tvo poka með hvítu dufti upp úr ferðatösku.

Samkvæmt gögnum málsins muldi hann duftið með greiðslukorti áður en hann neytti þess með því að sjúga það upp í nefið í gegnum upprúllaða peningaseðla. Hann mun ítrekað hafa sagt viðstadda að um kókaín væri að ræða.

Síðar um kvöldið, þegar rætt var um kostnað vegna leigubíls, er Barnicoat sagður hafa fullyrt að hann væri aldrei peningalaus þar sem hann gæti ávallt aflað tekna með fíkniefnasölu.

Nefnd á vegum Teaching Regulation Agency taldi sannað að meiri líkur en minni væru á því að duftið hefði verið kókaín og að Barnicoat hefði bæði haft efnið í vörslum sínum og neytt þess. Ásökun um að hann hefði reynt að hafa áhrif á framburð vitnis var hins vegar ekki talin sönnuð.

Barnicoat hóf störf við skólann í september 2022 en sagði upp í febrúar 2024 meðan rannsókn málsins stóð yfir.

Nefndin taldi háttsemi hans sérstaklega alvarlega og langt undir þeim faglegu kröfum sem gerðar eru til kennara. Þá hefði hann hvorki tekið þátt í málsmeðferðinni né sýnt merki um iðrun.

Barnicoat hefur því verið bannað að kenna ótímabundið en getur óskað eftir endurskoðun bannsins í júní 2031.