Kristrún Frostadóttir segir stríðsrekstur Ísraela á Gaza vera óverjandi.

Forsætisráðherra Íslands, Kristrún Frostadóttir, segir í skriflegu svari til Mannlífs að stríðsrekstur Ísraela á Gaza sé ekki hægt að verja og að ríkisstjórn hennar hafi komið afstöðu sinni á framfæri með ýmsum hætti.

Þann 30. maí 2024 sagði Kristrún Frostadóttir í viðtali við Vísi eftirfarandi:

„Með þessu erum við einfaldlega að segja að ef við værum í ríkisstjórn þá þyrfti að sýna sama siðferðisþrek þegar kemur að þessu baráttumáli og almenningur á Íslandi hefur sýnt. Það er ríkur vilji, meðal íslensks almennings um að styðja við palestínsku þjóðina. Við erum í mjög sterkri stöðu til að nýta rödd okkar á alþjóðasviðinu bæði í að vera mjög sterk þegar kemur að fordæmingu, halda á lofti okkar sérstöðu þegar kemur að sögu og tengslum okkar við Palestínu en líka að fara fyrir því og leiða samtal við Norðurlandaþjóðirnar um að við sjáum pólitískar og efnahagslegar afleiðingar af því að Ísrael virði að vettugi allt það sem alþjóðasamfélagið er að þrýsta á þessa daga.“

Mannlíf sendi Kristrúnu eftirfarandi spurningar í tölvupósti: „Hvernig gengur samtal ríkisstjórnarinnar við Norðurlandaþjóðirnar um að beita Ísrael þrýstingi á pólistískan og efnahagslegan hátt? Má búast við viðskiptaþvingunum á Ísrael á næstunni eða eitthvað sambærilegt?“

Nú, ellefu dögum eftir að spurningarnar voru sendar á forsætisráðuneytið barst Mannlífi svar. Þar segir Kristrún stríðsrekstur Ísraela á Gaza vera óverjandi og að Ísland hafi komið áþreifanlegum viðbrögðum á framfæri, meðal annars með sérstakri greinargerð til Alþjóðadómstólsins í Haag.

„Stríðsrekstur Ísraela á Gasa er óverjandi og Ísland hefur ítrekað fordæmt framgöngu Ísraels í Palestínu. Við höfum komið afstöðu okkar á framfæri með ýmsum hætti, til dæmis á vettvangi Sameinuðu þjóðanna og með sérstakri greinargerð til Alþjóðadómstólsins í Haag. Þetta eru áþreifanleg viðbrögð að okkar mati og við nýtum öll þau tækifæri sem okkur gefast til að hafa áhrif.“

Hvað varðar samtal við Norðurlöndin um sameiginlegar refsingar á hendur Ísrael, segir Kristrún að ekki hafi náðst samstaða um slíkar aðgerðir.

„Ísland á einnig í virku samtali við hin Norðurlöndin um málefni Palestínu en fram að þessu hefur ekki verið samstaða um refsiaðgerðir gagnvart Ísrael.“