24 ára kona hlaut alvarleg brunasár þegar eldur kviknaði við keisaraskurð á sjúkrahúsi í Prag í Tékklandi. Atvikið átti sér stað 25. ágúst og hefur sjúkrahúsið hafið rannsókn á því.

Konan gekkst undir bráðakeisaraskurð á Bulovka-sjúkrahúsinu vegna fylgikvilla við fæðingu. Tékkneski miðillinn Denik N greinir frá því að kviknað hafi í sótthreinsiefni sem notað var við aðgerðina þegar starfsfólk beitti skurðtæki til að stöðva blæðingu.

Konan hlaut brunasár á kynfærum, lærum, síðum og neðri hluta kviðar. Barnið sakaði hins vegar ekki.

Konan var í kjölfarið flutt á annað sjúkrahús í Prag, þar sem sérhæfð brunadeild er starfrækt. Hún hefur síðan verið flutt aftur á Bulovka-sjúkrahúsið.

Talskona sjúkrahússins segir konuna vera í stöðugu ástandi og ekki þurfa á gjörgæslu að halda. Hún dvelur nú á almennri deild ásamt barni sínu.

Bulovka-sjúkrahúsið komst einnig í fréttir árið 2024 þegar þungunarrof var fyrir mistök framkvæmt á rangri konu eftir að tveimur konum hafði verið ruglað saman en konurnar voru báðir af asískum uppruna. Sjúkrahúsið greiddi konunni síðar bætur vegna mistakanna.