Vodkamerkið Svedka hefur endurvakið hina þekktu vélmennapersónu Fembot eftir tæplega 13 ára fjarveru úr auglýsingum vörumerkisins.
Persónan mun nú birtast í nýrri auglýsingu sem sýnd verður í tengslum við Ofurskálina, eða Super Bowl eins og viðburðurinn heitir á ensku, en athygli vekur að auglýsingin var að mestu leyti framleidd með gervigreind.
Í 30 sekúndna auglýsingunni má sjá Fembot ásamt Brobot, sem er ný persóna, dansa fyrir framan hóp veislugesta. Í myndbandinu uppgötva vélmennin jafnframt Svedka-vörur sem leynast innan í líkömum þeirra. Framleiðsla auglýsingarinnar byggði nær alfarið á gervigreindarlausnum fremur en hefðbundnum leiðum. Dýrar auglýsingar í Super Bowl hafa lengi verið hefð í Bandaríkjunum og þykja sumar auglýsingarnar merkilegri en viðburðurinn sjálfur.
Dansatriði vélmennanna var valið úr fjölda tillagna sem bárust í gegnum keppni á samfélagsmiðlinum TikTok. Sigurvegarinn var Jessica Rizzardi, 23 ára íbúi í Nashville í Bandaríkjunum.
Eigandi Svedka, drykkjarvörufyrirtækið Sazerac, hefur kynnt auglýsinguna sem þá fyrstu sem sýnd er sem hluti af Ofurskálinni sem er „að mestu“ búin til með gervigreind.
