Hallgrímur Helgason, rithöfundur og listmálari hefur samið nýjan texta við lag Sveinbjörns Baldvinssonar, Lagið um það sem er bannað. Þar dregur Hallgrímur Nei-sinnana í ESB-umræðunni sundur og saman í háði.
Í nýja textanum, sem Hallgrímur birti fyrir síðustu helgi á Facebook, gerir hann stólpagrín að þeim sem ætla sér að segja Nei í komandi atkvæðagreiðslu um áframhaldandi viðræður um Evrópusambandsaðild Íslands. Þar fær Morgunblaðið á baukinn sem og nafntogaðir Nei-sinnar. Þá minnist rithöfundurinn á systurnar, þær Guðríði og Gyðu, sem er hugarsmíði Eddu Björgvinsdóttur en þar leikur hún forherta forrréttindakonu, sem er með flest á hornum sér.
Höfundur upprunatextans, Sveinbjörn Baldvinsson hrósar Hallgrími fyrir nýja textann í Facebook-færslu þar sem hann segir:
„Ljómandi kvæði hjá Hallgrími Helgasyni. Hafi hann sæll ort og megi þessi jákvæði bragur hljóma sem víðast.“
Hér má sjá nýju útgáfu Hallgríms:
Lagið um það sem er bannað
Það má ekki prófa að segja já
og ekki einu sinni fá að sjá.
Við eigum bara að hlýða
og setja kross við Nei-ið,
þá ríka fólkið verður allt svo fegið.
Það má ekki skoða betra lán
og ekki gera samanburð við Spán
og ekki tala um fiskinn
án þess að spyrja herra
því hann er ekki okkar heldur þeirra.
Þetta neikvæða lið er svo skrýtið.
Það er alltaf að skamma mann.
Þó maður geri ekki neitt,
það er alltaf að skamma mann.
Það má ekki lækka verð á mat
því annars borðar þjóðin á sig gat.
Bara vera áfram
í tveimur þremur vinnum
og borga húsið þrisvar fjórum sinnum.
Það má ekki tala um ESB.
Það má bara hlusta á ÓRG
og lesa langar greinar
frá Halla, Sollu, Villa.
Þau eru klár og þekkja marga milla.
Þetta neikvæða lið er svo skrýtið.
Það er alltaf að skamma mann.
Þó maður geri ekki neitt,
það er alltaf að skamma mann.
Það má ekki prófa eitthvað nýtt.
Allt er svart þótt sýnist vera hvítt.
Og ekki kíkja í pakkann,
það fúla fyrirbæri.
Í honum eru bara tækifæri.
Það má ekki segja Guten Tag
og ekki finna ástina í Prag.
Bara vera heima
og borga krónuskattinn
því evran hún er verri en sjálfur skrattinn.
Þetta neikvæða lið er svo skrýtið.
Það er alltaf að skamma mann.
Þó maður geri ekki neitt,
það er alltaf að skamma mann.
Við eigum bara að hlusta á SFS
og þá sem voru á móti EES
en eru núna með því
og líka á ömmu og afa
sem hringja úr íbúðinni á Costa Brava.
Það má aldrei breyta neinu hér,
þá getur enginn vitað hvernig fer.
Því hér er best að búa
og best að eiga krakka
og það er ekki Þorgerði að þakka!
Þetta neikvæða lið er svo skrýtið.
Það er alltaf að skamma mann.
Þó maður geri ekki neitt,
það er alltaf að skamma mann.
Það má ekki heldur gera grín
að þeim sem þamba Nei-ið eins og vín.
Þær Guðríður og Gyða,
þær eiga flottar bokkur
og eiga líka kvótann fyrir okkur.
Það má ekki horfa á forsætis-
ráðherra í Rest is Politics.
Við gætum skipt um skoðun
og kosið eitthvað annað,
eitthvað sem að Mogginn hefur bannað.
Þetta neikvæða lið er svo skrýtið.
Það er alltaf að skamma mann.
Þó maður geri ekki neitt,
það er alltaf að skamma mann.
