Bob Iger, forstjóri Disney til margra ára, og milljarðamæringurinn Josh Kushner hafa náð samkomulagi um kaup á NBA-liðinu Los Angeles Lakers fyrir 12 milljarða Bandaríkjadala, samkvæmt fjölmiðlum vestanhafs.

Gangi kaupin eftir verður um að ræða hæsta verð sem greitt hefur verið fyrir bandarískt íþróttafélag. Kaupverðið jafngildir um 1.450 milljörðum íslenskra króna miðað við núverandi gengi.

Iger og Kushner höfðu áður komið að tilraunum til að koma NBA-liði á fót í Las Vegas en hafa nú snúið sér að Lakers, einu þekktasta og sigursælasta félagi NBA-deildarinnar.

Í sameiginlegri yfirlýsingu sögðust þeir hafa verið aðdáendur NBA-deildarinnar alla ævi og það væri mikill heiður að fá tækifæri til að taka við ábyrgð á Lakers. Þeir lýstu jafnframt yfir mikilli virðingu fyrir Jerry og Jeanie Buss og sögðust ætla að byggja áfram á þeim grunni sem lagður hefði verið hjá félaginu.

Kushner er stofnandi fjárfestingarfélagsins Thrive Capital og eiginmaður fyrirsætunnar Karlie Kloss. Hann er jafnframt yngri bróðir Jared Kushner, tengdasonar Donalds Trump Bandaríkjaforseta.