Rannsókn sem fyrirtækið ReverseLookup gerði á 9.100 fullorðinna sýnir að meira en helmingur fólks (52%) frestar því viljandi að svara skilaboðum eða samþykkja boð þegar það er í makaleit. Markmiðið er að virðast ekki örvæntingarfullt eða of tiltækt, jafnvel þótt engar aðrar áætlanir séu á dagskrá.

Þá sýna niðurstöður að 37% svarenda hafa hreinlega logið til um að vera upptekin og þriðjungur hefur hafnað hittingi samdægurs sem þeir vildu þó fara á. Ástæðan er ótti við að bera of mikinn áhuga á borð.

Sálfræðilegur gerviskortur

Hegðunin á rætur sínar að rekja til svokallaðrar skortsreglu í sálfræði. Rannsóknir sýna að fólk metur hluti og aðra einstaklinga hærra ef framboðið er takmarkað. Þannig þykir einstaklingur sem er „sértækur“ eða erfiðara er að ná í oft meira heillandi í fyrstu.

Þessi taktík getur hins vegar haft öfug áhrif. Tæplega 30% svarenda sögðust missa áhuga á fólki sem er stöðugt „of tiltækt“. Almennt er litið svo á að sá sem er alltaf laus með stuttum fyrirvara eigi minna félagslíf.

Þversögnin í samskiptum

Í þessu er hins vegar ákveðin þversögn. Sú hegðun sem skapar mesta nánd og byggir upp raunverulegt traust eins og að svara fljótt, sýna sveigjanleika og vera hreinskilinn er nákvæmlega sú sama og fólk forðast til að virðast ekki of auðvelt að ná í.

Sálfræðirannsóknir staðfesta að það að leika „erfitt að ná“ getur kveikt áhuga í skamman tíma, en eyðileggur nándina þegar fram í sækir.