Leó XIV páfi sagðist í dag ætla að feta í fótspor forvera síns sem leiðtogi kirkjunnar og hrósaði Frans páfa fyrir „algjöra einlægni í þjónustu“, en nafnaval hans endurspegli skuldbindingu við samfélagsmál, að því er fram kemur í tilkynningu frá Vatíkaninu.
Í ávarpi til kardínála, tveimur dögum eftir að hann var kjörinn sem 267. páfi kaþólsku kirkjunnar, sagði hinn bandaríski Leó, sem fæddist í Chicago undir nafninu Robert Francis Prevost, að páfi væri „auðmjúkur þjónn Guðs og bræðra og systra sinna — og ekkert annað en það.“
Í einu af sínum fyrstu ræðum sem páfi lýsti hann sjálfum sér sem „óverðugum erfingja heilags Péturs“ og hrósaði Frans fyrir trúfesti við „hófsaman og einfaldan lífsstíl.“
„Við skulum taka við þessari dýrmætu arfleifð og halda áfram ferðinni, innblásin af þeirri von sem fæðist af trú,“ sagði hann samkvæmt ræðu sem Vatíkanið birti í heild sinni.
Leó er fyrsti páfi kaþólsku kirkjunnar — sem telur um 1,4 milljarð manna — sem kemur frá Bandaríkjunum. Hann sagði að nafnið Leó XIV væri valið til heiðurs Leó XIII, páfa á 19. öld sem barðist fyrir réttindum verkafólks.
„Ég valdi nafnið Leó XIV,“ sagði hann, „því nafni minn frá fyrri tíð tók á samfélagslegum málum á tímum fyrstu iðnbyltingarinnar.“
Í dag, bætti hann við, sé samfélagskenning kirkjunnar enn mikilvægari „til að bregðast við annarri iðnbyltingu og þróun á sviði gervigreindar sem skapar nýjar áskoranir við vernd mannlegrar reisnar, réttlætis og vinnu.“
Í fyrstu predikun sinni sem páfi á föstudag hvatti Leó kirkjuna til að endurvekja trú meðal milljóna manna og varaði við því að skortur á trú tengdist oft „tómleika, skorti á miskunn, alvarlegum brotum gegn mannlegri reisn, kreppu fjölskyldunnar og mörgum öðrum sárum sem hrjá samfélagið.“
Leó, sem tilheyrir Ágústínusarreglunni og var gerður að kardínála af Frans árið 2023, er ekki mjög þekktur á heimsvísu en hafði þó verið nefndur í umræðum um hugsanlega eftirmenn Frans fyrir páfakjör.
Á næstu dögum munu orð hans og gjörðir verða í brennidepli.
Á morgun mun hann ávarpa fólkið á ný frá svölum Péturskirkju og flytja Regina Coeli bænina.
Í næstu viku hyggst hann funda með erlendum sendiherrum í Vatíkaninu og þann 18. maí mun hann leiða vígslumessu sína á Péturstorgi, þar sem búist er við heimsleiðtogum og þúsundum pílagríma.
