Ethel Caterham, elsti lifandi einstaklingur heims, fagnar í dag 117 ára afmæli sínu og segir leyndarmálið á bak við langlífið vera einfalt: að rífast aldrei við neinn, hlusta á aðra og lifa lífinu á eigin forsendum. Hún fæddist í Hampshire á Englandi árið 1909 og er í dag síðasti lifandi manneskjan sem fæddist í valdatíð Játvarðs VII Bretakonungs.
Caterham fagnaði stórafmælinu á hjúkrunarheimili sínu í Surrey á Englandi, umkringd fjölskyldu og vinum. Hún tók opinberlega við titlinum elsta manneskja heims í apríl árið 2025, eftir að brasilíska nunnan systir Inah Canabarro Lucas lést, 116 ára að aldri.
Lifði af tvær heimsstyrjaldir og Covid-19
Á 117 árum hefur lífshlaup Caterham spannað helstu stórviðburði mannkynssögunnar. Hún fæddist þremur árum áður en farþegaskipið Titanic sökk og upplifði báðar heimsstyrjaldirnar sem og fall Berlínarmúrsins. Alls hefur hún lifað sex mismunandi breska þjóðhöfðingja. Líf hennar hefur einnig einkennst af miklu ferðalagi og seiglu.
Sem 18 ára stúlka ferðaðist hún ein til Indlands til að starfa sem barnapía og stofnaði síðar leikskóla í Hong Kong, þar sem hún bjó ásamt eiginmanni sínum sem var undirofursti í hernum.
Hún keyrði bíl fram til 97 ára aldurs og sýndi ótrúlegt heilsuhreysti þegar hún smitaðist af Covid-19 árið 2020, þá 110 ára gömul og náði fullum bata.
Heimsókn frá konungi
Á síðasta ári fékk Caterham óvænta og virðulega heimsókn þegar Karl III Bretakonungur leit við á hjúkrunarheimilinu, ræddi við hana og hélt í hönd hennar. Í spjalli þeirra minntist hún þess þegar hann var krýndur prins af Wales árið 1969 og sagði konungi djarflega frá því að allar stúlkur landsins hefðu verið ástfangnar af honum á þeim tíma.
Þrátt fyrir að vera elst núlifandi fólks á Caterham enn nokkur ár í land með að slá met frönsku konunnar Jeanne Calment, sem lést árið 1997 tæplega 122 ára og 164 daga gömul, en hún er opinberlega elsta manneskja sögunnar sem sögur fara af.
