Bandaríkjamaðurinn Michael Phillips, sem vakið hefur mikla athygli fyrir að segjast vera með minnsta getnaðarlim í heimi, gekkst á mánudag undir aðgerð sem ætlað er að auka umfang limsins. Hann segir aðgerðin hafa heppnast vel.
Phillips greindi frá þessu í samtali við TMZ. Aðgerðin fór fram á sjúkrahúsi í Norður-Karólínu og fólst í því að hálfvaranlegu fylliefni var sprautað í getnaðarliminn til að auka ummál hans.
Að sögn Phillips tók heimsóknin um þrjár klukkustundir. Fyrst var deyfikrem borið á svæðið og honum síðan gefin staðdeyfing áður en fylliefninu var sprautað á nokkra staði.
Phillips segir að markmið aðgerðarinnar hafi ekki verið kynferðislegt heldur hafi hann fyrst og fremst viljað auðvelda sér þvaglát. Þegar limurinn væri slakur drægist hann venjulega inn í líkamann, sem hefði valdið honum óþægindum. Eftir aðgerðina haldist hann hins vegar úti og segir Phillips það þegar hafa gert þvaglát þægilegri.
Nokkur bólga er enn á svæðinu og er búist við að hún vari í um viku. Endanleg niðurstaða aðgerðarinnar liggur því ekki fyrir fyrr en bólgan hefur hjaðnað.
Aðgerðin kostaði Phillips um fjögur þúsund Bandaríkjadali, jafnvirði rúmlega hálfrar milljónar íslenskra króna. Hann safnaði fyrir henni með söfnun á GoFundMe.
Phillips hafði áður íhugað skurðaðgerð en hætti við vegna þeirrar áhættu sem henni fylgdi. Hann segir lækna hafa tjáð sér að mögulegt sé að endurtaka fylliefnameðferðina eftir sex mánuði, annaðhvort til frekari stækkunar eða til að viðhalda árangrinum.
Phillips hefur áður haldið því fram að getnaðarlimur hans mælist aðeins 0,38 tommur, eða tæpur einn sentímetri, í reisn. Eftir nýjustu meðferðina kann hann því að eiga erfiðara með að gera tilkall til óformlegs titils síns sem maðurinn með minnsta getnaðarlim heims.
