Bandaríkjamaðurinn Michael Phillips, sem segist vera með minnsta getnaðarlim í heimi, hefur ákveðið að gangast undir meðferð til að auka ummál limsins. Aðgerðin er fyrirhuguð 17. ágúst í Charlotte í Norður-Karólínu.
Phillips greinir frá þessu í samtali við TMZ. Um er að ræða meðferð þar sem fylliefni verður sprautað í getnaðarliminn með það að markmiði að auka ummál hans. Kostnaðurinn við meðferðina verður tæplega fjögur þúsund Bandaríkjadalir.
Phillips hafði áður stofnað til söfnunnar á GoFundMe til að fjármagna meðferð vegna ástandsins og hafa safnast þar meira en 13 þúsund dalir. Hann segir hluta þess fjár sem eftir stendur verða nýttan til að greiða fyrir læknisheimsóknir, eftirfylgni og lyf.
Phillips segist hafa verið greindur af lækni með svokallaðan örlim (e. micropenis). Hann hefur áður lýst því að getnaðarlimur hans sé um 0,38 tommur, eða tæpur einn sentímetri, þegar hann er í reisn og að ástandið valdi honum meðal annars erfiðleikum við þvaglát.
Upphaflega hugðist Phillips gangast undir skurðaðgerð en hætti við vegna þeirrar áhættu sem henni gæti fylgt. Hann ákvað þess í stað að fara í meðferð með fylliefni.
Læknir í Beverly Hills hafði áður boðist til að framkvæma meðferð á Phillips án endurgjalds en hann ákvað að leita meðferðar nær heimili sínu. Phillips segist bæði þakklátur og spenntur fyrir aðgerðinni sem fram undan er.
