Bandaríski söngvarinn Lionel Richie, 77 ára, var lagður inn á gjörgæsludeild sjúkrahúss í St. Louis um síðastliðna helgi. Um er að ræða aðra spítalainnlögn stjörnunnar á þessu sumri, en hann þurfti einnig að leita læknisaðstoðar í júní síðastliðnum.
Innlögnin átti sér stað á laugardagskvöld eftir að Richie lauk tónleikum á hinu þekkta útileikhúsi The Muny í St. Louis. Samkvæmt sjónarvottum og fréttum vestanhafs átti söngvarinn í nokkrum erfiðleikum undir lok sýningarinnar vegna mikils hita á svæðinu. Hann þurfti að biðja starfsfólk sitt um stól á sviðinu til þess að geta klárað að flytja lokaslagara kvöldsins, „All Night Long“, sitjandi. Skömmu eftir að hann steig af sviði var farið með hann á sjúkrahús.
Heimildir herma að Richie hafi verið vistaður á gjörgæsludeild svo læknar gætu fylgst náið með honum og framkvæmt rannsóknir, en grunur leikur á að hann hafi þjáðst af alvarlegum vökvaskorti. Fólk nálægt söngvaranum segir hann þó ágætlega á sig kominn miðað við aðstæður og að innlögnin sé fyrst og fremst varúðarráðstöfun. Vonast er til þess að hann verði útskrifaður fljótlega.
Þetta er í annað sinn á skömmum tíma sem Richie veikist á sviði. Í júní síðasliðinn þurfti hann að stöðva tónleika snemma í Minnesota eftir að hafa fundið fyrir miklum svima og var hann þá fluttur með sjúkrabíl til skoðunar.
Richie er sem stendur á tónleikaferðalagi og eru næstu fyrirhuguðu tónleikar hans áætlaðir í San Francisco þann 26. september. Ekki liggur fyrir hvort veikindin muni hafa áhrif á framhald ferðalagsins.
