Lögreglan á höfuðborgarsvæðinu hafði í nógu að snúast í nótt og í gærkvöldi og kom meðal annars að rannsókn alvarlegrar hnífaárásar, innbroti, þjófnaði og akstri undir áhrifum áfengis og fíkniefna.
Tilkynning barst um blóðugan mann sem hafði orðið fyrir líkamsárás. Við nánari athugun kom í ljós að hann hafði verið stunginn með hnífi. Greinargóð lýsing á meintum árásarmanni fylgdi tilkynningunni og hafði lögregla upp á honum skömmu síðar. Var hann handtekinn og vistaður í fangaklefa. Sá sem varð fyrir árásinni var fluttur á bráðamóttöku til aðhlynningar. Málið er til rannsóknar.
Þá var lögreglu tilkynnt um yfirstandandi innbrot í fyrirtæki. Þegar lögreglumenn komu á vettvang var meintur gerandi enn inni í húsnæðinu og var hann handtekinn. Hann reyndist vera í annarlegu ástandi og var vistaður í fangaklefa þar til unnt verður að ræða við hann.
Lögregla hafði einnig afskipti af manni sem grunaður var um að vera með stolið reiðhjól. Grunur vaknaði þar sem hann hélt á hjólinu með lásinn enn fastan við hjólabúnaðinn. Maðurinn var fluttur á lögreglustöð til viðræðna og reiðhjólinu komið í örugga vörslu.
Í öðru máli var lögregla kölluð til að vísa einstaklingi út úr íbúð og var það mál leyst á vettvangi. Einnig var tilkynnt um þjófnað úr matvöruverslun sem afgreiddur var á staðnum.
Tveir ökumenn voru stöðvaðir við almennt umferðareftirlit. Annar reyndist ölvaður undir stýri og jafnframt sviptur ökuréttindum vegna sambærilegra brota. Hinn reyndist vera undir áhrifum fíkniefna við akstur. Báðir voru fluttir á lögreglustöð í hefðbundið ferli og látnir lausir að því loknu.
Loks stöðvaði lögregla tvö ungmenni á vespu þar sem hvorugt þeirra var með hjálm. Málið var afgreitt á vettvangi en lögregla ítrekar mikilvægi þess að foreldrar brýni fyrir ungmennum nauðsyn þess að nota viðeigandi hlífðarbúnað við akstur á vespum og öðrum sambærilegum farartækjum.
