Lögreglan á höfuðborgarsvæðinu rannsakar nú tvö umfangsmikil fíkniefnamál, en í þeim var lagt hald á samtals 177 kg af fíkniefnum en þetta kemur fram í tilkynningu frá lögreglu.
Samtals sitja tíu manns í gæsluvarðhaldi vegna rannsóknanna, þar af þrír Íslendingar og sjö erlendir ríkisborgarar.
Í stærra málinu lagði lögregla hald á 108 kíló af kókaíni, sem er mesta magn kókaíns sem fundist hefur í einni sendingu hér á landi. Fíkniefnin komu með flutningaskipi frá Suður-Ameríku til Straumsvíkur og voru falin í sjókistu undir skipinu. Í kjölfar umfangsmikillar rannsóknar voru framkvæmdar handtökur á höfuðborgarsvæðinu og víðar. Níu menn sitja í gæsluvarðhaldi vegna málsins, þrír Íslendingar og sex erlendir ríkisborgarar. Flestir eru á fimmtugsaldri, en aldur þeirra spannar frá þrítugsaldri upp í sextugsaldur. Sérsveit ríkislögreglustjóra tók þátt í aðgerðunum.
Í hinu málinu fannst metmagn amfetamíns, alls 56 kíló, í húsbíl sem kom til landsins með Norrænu. Ökumaðurinn, erlendur ríkisborgari á sextugsaldri, var handtekinn á Norðurlandi fyrr í mánuðinum. Auk amfetamíns fundust í bílnum átta kíló af kókaíni, þrjú kíló af ketamíni, eitt kíló af kristalmetamfetamíni og eitt kíló af svokölluðu bleiku kókaíni.
Rannsókn beggja málanna fer fram í nánu samstarfi lögregluembætta, Tollgæslunnar og Europol, sem hefur meðal annars sent tvo fulltrúa til Íslands til að aðstoða við rannsóknina.
