Spænska lögreglan rannsakar dauða 61 árs gamallar þýskrar konu sem fannst látin í gili á Kanarí. Grunur leikur á að konan hafi verið myrt samkvæmt spænskum fjölmiðlum.

Lík konunnar fannst í Cañada de los Gatos-gilinu í Mogán á suðurhluta eyjunnar. Vegfarendur sem áttu leið um svæðið fundu líkið og gerðu yfirvöldum viðvart.

Samkvæmt upplýsingum sem fram hafa komið um rannsókn málsins fannst stór steinn á höfði konunnar og hafði hún hlotið alvarlega höfuðáverka. Aðstæður á vettvangi hafa vakið grunsemdir um að dauða hennar hafi ekki borið að með slysförum.

Lögreglan rannsakar málið því sem mögulegt manndráp, þótt yfirvöld hafi tekið fram að ekki hafi enn verið staðfest að konan hafi orðið fyrir árás.

Lögregla staðfesti á laugardag hver hin látna var. Hún var 61 árs þýskur ríkisborgari sem hafði búið á Kanarí og átti fjölskylda hennar fasteign á eyjunni. Að undanförnu hafði hún þó hafst við í bráðabirgðaskýli eða tjaldi skammt frá þeim stað þar sem lík hennar fannst.

Rannsakendur vinna nú að því að rekja ferðir konunnar síðustu dagana áður en hún lést og varpa ljósi á hvað gerðist.

Frekari rannsókn lögreglu munu meðal annars beinast að því að staðfesta dánarorsök konunnar og hvort annar einstaklingur hafi átt þátt í dauða hennar. Rannsókn málsins stendur enn yfir.