Í dagbók lögreglu frá því í dag er greint frá því að brotist hafi verið inn á hótel í miðbænum og áfengi stolið þaðan.

Þá var ökumaður í Hafnarfirði tekinn á 133 kílómetra hraða þar sem hámarkshraði var 90. Það var svo í Árbænum sem tilkynnt var um vinnuslys. Þar hafði borvél dottið ofan af vinnupalli og borinn stungist í læri á manni. Hann var fluttur á bráðamóttöku til aðhlynningar.

Það var þó ekki eina slysið í Árbænum en maður datt við vinnu og fann fyrir verkjum í hægri mjöðm. Hann var í kjölfarið fluttur á bráðamóttökuna.

Tilkynnt var um innbrot í skóla í hverfi 105. Þaðan var stolið tölvu og myndvarpa en þjófurinn var farinn af vettvangi. Hann fannst skömmu síðar og komst þýfið til skila.