Marín Ösp Ómarsdóttir skrifaði hjartnæma færslu á Facebook þar sem hún talar um andlát tvíburasystur hennar, Bríeti Irmu, en hún var aðeins 24 ára gömul þegar hún tók sitt eigið líf á dögunum. Í færslunni gagnrýnir hún stjórnvöld fyrir aðgerðarleysi í geðheilbrigðismálum, sérstaklega á landsbyggðinni.

„Elsku tvíburasystir mín, Bríet Irma er farin frá okkur,“ skrifar hún og heldur áfram: „Hún var aðeins 24 ára, björt, falleg og með einstakan hlátur sem fyllti hvert herbergi. Hún hafði mikla réttlætiskennd og ótrúlega hæfileika. Hún var skapandi, skemmtileg og gefandi manneskja. Hún var líka móðir. Elsku Atalía Örk, þriggja ára gömul situr nú eftir án mömmu sinnar. Það tómarúm sem hún skilur eftir sig verður aldrei fyllt.“

Í færslunni segir hún frá því að systir hennar hafi alla tíð glímt við andleg veikindi og síðar fíknivanda, en jafnframt verið í stöðugri leit að bata. „Biðlistar, skortur á úrræðum, óaðgengileg þjónusta var allt sem gerði veikindin þyngri og einmannalegri. Þegar við reyndum að berjast fyrir henni var okkur ítrekað vísað á milli, eins og ábyrgðin væri alltaf annars staðar. Það endaði með þessari hörmulegu niðurstöðu,“ skrifar hún.

Marín Ösp beinir jafnframt gagnrýni að stjórnvöldum og þeirri stöðu sem blasir við fólki á landsbyggðinni. Hún bendir á að á Austurlandi, þar sem Bríet bjó, sé „geðheilbrigðisþjónusta takmörkuð, fáir fagaðilar til staðar og engin sérhæfð úrræði fyrir ungt fólk.“

„Hvað þarf að gerast áður en stjórnvöld bregðast við? Hversu mörg líf þurfa að tapast áður en kerfið vaknar?“ spyr hún og leggur áherslu á að Bríet verði ekki aðeins ein í röð talna um sjálfsvíg. „Hún var systir, hún var móðir, hún var dóttir og hún var vinkona. Og nú er hún farin. Ég vil ekki að hún verði bara ein í röð talna um sjálfsvíg. Ég vil að saga hennar verði hvatning til vitundarvakningar. Að hún verði áminning um að hér þurfi aðgerðir!!“

Hún krefst þess að raunveruleg úrræði verði byggð upp: „EKKI fleiri áætlanir, EKKI fleiri skýrslur, heldur raunveruleg úrræði, fagfólk og stuðningur fyrir þá sem glíma við geðrænan vanda.“

Marín Ösp minnist systur sinnar einnig með þessum orðum: „Bríet var ljós í lífi okkar allra. Ljós sem lýsti bjart en dofnaði allt of fljótt. Hún átti betra skilið, og dóttir hennar á betra skilið. Við skuldum henni og öllum þeim sem enn berjast í myrkrinu, að standa vörð um geðheilbrigði á Íslandi.“

Að lokum þakkar hún öllum þeim sem sýnt hafa fjölskyldunni hlýjan stuðning og bendir á framtíðarsjóð sem stofnaður hefur verið fyrir dóttur Bríetar. Hér má sjá upplýsingar um þann reikning:

Kt. 020921-4390

Reikningsnr. 0123-18-206962