Menntasjóður námsmanna hefur stefnt karlmanni vegna ógreidds námsláns að fjárhæð tæplega 9,9 milljónir króna. Málið hefur verið höfðað fyrir Héraðsdómi Reykjavíkur en maðurinn er búsettur á Spáni samkvæmt upplýsingum úr Þjóðskrá.

Samkvæmt stefnunni nam upphaflegt námslán rúmlega 7,2 milljónum króna þegar það var tekið árið 2009. Námslok voru skráð árið 2012 og hefur lánið síðan borið verðtryggingu og vexti samkvæmt lögum og reglum sem giltu um námslán á þeim tíma.

Í stefnunni kemur fram að skuldabréfið hafi verið í vanskilum frá 1. mars 2024. Vegna verulegra vanskilanna var öll eftirstöðvaskuldin gjaldfelld í mars 2025. Samkvæmt sundurliðun Menntasjóðsins nema gjaldfallnar eftirstöðvar rúmlega 8,8 milljónum króna og heildarkrafan er því 9.857.855 krónur auk dráttarvaxta og málskostnaðar.

Tilraunir voru gerðar til að birta stefnuna á Spáni, en spænsk yfirvöld staðfestu aldrei að birting hefði farið fram. Þar sem engin svör bárust þrátt fyrir ítrekaðar tilraunir var ákveðið að birta stefnuna í Lögbirtingablaðinu.

Málið verður þingfest í Héraðsdómi Reykjavíkur 8. september.