Að minnsta kosti 27 manns létust þegar mikill eldur braust út á skemmtistað í Bangkok, höfuðborg Taílands, skömmu eftir miðnætti aðfaranótt mánudags.

Björgunarsveitir segja að tilkynning um eldinn hafi borist um miðnætti. Myndskeið sem fyrstu viðbragðsaðilar birtu á netinu sýna gríðarlega eldtungu streyma út um aðalinngang skemmtistaðarins í norðurhluta borgarinnar á meðan gestir reyndu að flýja. Þykkan svartan reyk lagði til himins.

Forsætisráðherra Taílands, Anutin Charnvirakul, sagði á vettvangi að 27 manns hefðu látist og að nokkrir til viðbótar hefðu verið fluttir á sjúkrahús.

Hann sagði að orsök brunans væri enn til rannsóknar.

Slökkviliðsmönnum tókst að ná tökum á eldinum á um hálftíma.

Ljósmyndir frá vettvangi eftir brunann sýna sviðin borð og stóla auk þess sem innviðir skemmtistaðarins eru mikið skemmdir.

Taíland hefur áður orðið fyrir mannskæðum eldsvoðum á skemmtistöðum.

Árið 2022 létust 14 manns í bruna á tónlistarbar í austurhluta landsins.

Þá létust 66 manns og yfir 200 slösuðust í eldsvoða á Santika-næturklúbbnum í Bangkok á nýársnótt árið 2009. Talið er að sá eldur hafi kviknað vegna flugeldasýningar sem haldin var innandyra.