Kona í Flórída í Bandaríkjunum skaut móður sína og tvö barna sinna til bana áður en hún svipti sig lífi. Lögregla telur að atburðarásin hafi átt sér stað í kjölfar harðra deilna konunnar og eiginmanns hennar vegna klámefnis sem hún fann í síma hans.

Lögreglan í Plant City greindi frá niðurstöðum rannsóknar málsins á blaðamannafundi á fimmtudag. Atvikið átti sér stað 3. maí síðastliðinn á Tampa Bay-svæðinu.

Að sögn Richards Mills, lögreglustjóra í Plant City, skaut Hailey Dempsey fyrst móður sína, Valerie DeBoe, til bana á heimili fjölskyldunnar. Dempsey yfirgaf síðan heimilið ásamt þremur ungum dætrum sínum.

Rannsókn lögreglu leiddi í ljós að Dempsey skaut fjögurra mánaða gamla dóttur sína og fjögurra ára dóttur sína til bana. Hún skaut einnig að tveggja ára dóttur sinni en skotið geigaði og barnið lifði af. Skömmu síðar skaut Dempsey sjálfa sig til bana.

Mills sagði að lögregla hefði þrívegis verið kölluð að heimili fjölskyldunnar dagana fyrir harmleikinn.

Tveimur dögum áður, 1. maí, höfðu Dempsey og eiginmaður hennar, Jay, lent í hörðum orðaskiptum eftir að hún fann klám í farsíma hans.

Lögreglustjórinn sagði ekkert benda til þess að um framhjáhald hefði verið að ræða heldur hefðu deilurnar snúist um klámefnið sjálft. Að mati rannsakenda virðist rifrildið hafa verið upphafið að þeirri atburðarás sem lauk með fjórum dauðsföllum.

Rannsókn lögreglu á málinu er nú lokið.