Zunilda Hoyos Mendez, 43 ára gömul vaxtarræktarkona frá Kólumbíu, fannst barin til bana með hamri í þessari viku og Jarrod Gelling, eiginmaður hennar, fannst einnig látinn af hnífsárum. Talið er að hann hafi stungið sjálfan sig til bana.
Fjölmiðlar á Spáni segja að lögreglan hafi heimsótt hús hjónanna í spænska bænum Fuengirola á fimmtudaginn eftir að vinkona Mendez tilkynnti hana týnda daginn áður. Þegar lögreglan kom á vettvang fundu þeir hjónin látin í húsinu.
Samkvæmt fjölmiðlum hefur lögreglan úrskurðað að áverkarnir á líkama Mendez sýni „skýr merki um ofbeldi“ og að áverkarnir á Gelling bendi til þess að hann hefði svipt sig lífi. Krufning á þó eftir að staðfesta slíkt.
Samkvæmt vinum þeirra hjóna glímdu þau við erfiðleika í hjónabandi sínu og fjölskylda Mendez segist hafa vitað af því að Gelling hafi verið árásargjarn gagnvart henni og að hún hafi viljað skilja við hann.
Þau voru að undirbúa sig fyrir vaxtarræktarkeppni í Portúgal eftir nokkrar vikur og samkvæmt fjölskyldumeðlimum sem ræddu við fjölmiðla var planið að þau myndu skilja að keppninni lokinni.
Í þessari grein er fjallað um sjálfsvíg
Fólki með sjálfsvígshugsanir er bent á upplýsingasíma heilsugæslunnar s.1700, netspjallið heilsuvera.is, Hjálparsíma Rauða krossins s.1717, á netspjallið 1717.is og á Píeta símann s.552-2218. Þau sem misst hafa ástvin í sjálfsvígi er bent á stuðning í Sorgarmiðstöð s. 551-4141, upplýsingasíma heilsugæslunnar s.1700, netspjallið heilsuvera.is og á Píeta símann s.552-2218.
