Nemandi á Filippseyjum skaut skólafélaga sinn til bana fyrr í dagur áður en hann svipti sig lífi. Árásarmaðurinn sýndi frá ódæðinu í beinni útsendingu á samfélagsmiðlum.

Skotárásin átti sér stað í Ateneo de Zamboanga University, kaþólskum einkaskóla á vesturhluta Mindanao. Þetta er önnur skotárásin í filippseyskum skóla á aðeins tveimur mánuðum.

Shella Chang, talskona lögreglunnar á svæðinu, sagði í samtali við AFP að árásarmaðurinn hefði farið inn í kennslustofu þar sem fórnarlambið var statt og skotið það. Að því loknu hefði hann farið upp á fimmtu hæð skólabyggingarinnar og skotið sjálfan sig.

Victor Remulla, innanríkisráðherra Filippseyja, staðfesti að árásarmaðurinn hefði sýnt frá árásinni í beinni útsendingu á samfélagsmiðlum. Facebook-reikningi hans hefur síðan verið lokað.

Myndband úr útsendingunni hefur verið birt í filippseyskum fjölmiðlum. Þar sést skotvopn á ferð eftir gangi skólans áður en því er beint inn í kennslustofu og skotið. Í kjölfarið sjást nemendur öskra og flýja úr kennslustofunni.

Ekki liggur fyrir hversu margir særðust í árásinni og lögregla hefur enn ekki gefið upp aldur árásarmannsins eða fórnarlambsins.

Lögregla rannsakar nú ástæður árásarinnar, hvaðan skotvopnið kom og hver væri skráður eigandi þess. Þá er einnig til rannsóknar hvernig árásarmanninum tókst að koma vopninu inn á skólalóðina.

Faðir Guillrey Andal, forseti Ateneo de Zamboanga, staðfesti að tveir hefðu látist og sagði skólasamfélagið harmi slegið. Skólinn ynni náið með lögreglu að rannsókn málsins og lögð væri áhersla á að hafa fyrst samband við aðstandendur hinna látnu.

Skotárásir í skólum eru sjaldgæfar á Filippseyjum. Í júní létust þó þrír unglingar og tuttugu særðust í árás á skóla í miðhluta landsins. Í kjölfar þeirrar árásar efndu fjölmargir skólar til æfinga vegna mögulegra skotárása. Ateneo de Zamboanga hélt slíka æfingu í síðasta mánuði.

Lögleg byssueign er háð ströngum reglum á Filippseyjum en umfangsmikill svartur markaður með skotvopn er engu að síður til staðar í landinu.