Benjamin Netanyahu, forsætisráðherra Ísraels, hafnaði á sunnudag 15 liða áætlun um næstu skref á Gaza og sagði að ísraelski herinn myndi ekki draga sig til baka fyrr en Hamas-samtökin hefðu verið afvopnuð með raunverulegum hætti.

Netanyahu hefur á undanförnum dögum stigið fram með sífellt harðari gagnrýni á hana. Forsætisráðherrann sætir jafnframt þrýstingi frá hægri væng ísraelskra stjórnmála í aðdraganda kosninga.

Samkvæmt áætluninni eiga Hamas-samtökin að afhenda vopn sín nýrri palestínskri stjórnsýslu. Jafnframt er gert ráð fyrir að ísraelskar hersveitir hefji brottflutning frá Gaza samhliða afvopnun samtakanna.

Netanyahu hafnar þeirri nálgun og segir Ísrael ekki ætla að draga herlið sitt til baka fyrr en afvopnun Hamas hafi að fullu átt sér stað.

„Ísraelski herinn mun ekki draga sig til baka fyrr en Hamas hefur raunverulega verið afvopnað og mun áfram koma í veg fyrir ógnir gegn hersveitum okkar og borgurum,“ sagði Netanyahu.

Áætlunin er hluti af nýjasta áfanga vopnahlésferlis undir forystu Bandaríkjanna sem hófst í október. Það hefur dregið úr hernaðaraðgerðum Ísraels á Gaza en ekki bundið enda á þær.

Netanyahu fundaði með Trump í síðustu viku. Í kjölfarið sagði svokallað Friðarráð, sem hefur umsjón með framkvæmd samkomulagsins og Donald Trump skipaði, að Ísrael þyrfti ekki að hefja brottflutning fyrr en að lokinni „fullri“ afvopnun Hamas.

Netanyahu sagði Ísrael áfram eiga í viðræðum við Bandaríkjamenn um fyrirvara sína við áætlunina.

„Þeir hafa hugmyndir. Sumar þeirra eru ásættanlegar fyrir okkur en aðrar ekki og við vitum hvernig við eigum að standa fast á okkar í þessum málum,“ sagði Netanyahu.

Hann lagði jafnframt áherslu á að Hamas yrði að láta öll vopn af hendi.

„Við erum að tala um raunverulega afvopnun, ekki sýndarafvopnun,“ sagði Netanyahu.