Lögreglan í Fíladelfíu í Bandaríkjunum leitar nú að ungum manni sem grunaður er um að hafa ógnað og áreitt vegfarendur í miðborginni. Maðurinn bar grímu sem minnir á hryllingsmyndapersónuna Chucky þegar atvikin áttu sér stað.
Jason Smith, lögregluforingi í Fíladelfíu, segir manninn hafa veist að nokkrum einstaklingum í Center City-hverfinu. Atvikin áttu sér stað á um 20 mínútna tímabili.
Eitt atvikanna náðist á eftirlitsmyndavél. Þar sést maðurinn elta konu sem var úti að hlaupa snemma morguns. Hann veitti henni eftirför áður en hann gekk að henni og er sagður hafa spurt hana hvort hún væri „tilbúin að deyja“.
Samkvæmt upplýsingum lögreglu færði maðurinn jafnframt aðra höndina aftur fyrir bak með þeim hætti að konan taldi að hann kynni að vera með vopn.
Konan kallaði eftir aðstoð og hörfaði undan manninum. Við það hlaut hún minniháttar meiðsl á fæti. Grímuklæddi maðurinn flúði af vettvangi eftir að hún fór að öskra.
Konan er sú eina sem hefur tilkynnt atvik formlega til lögreglu en samkvæmt Smith er talið að maðurinn hafi einnig veist að eða reynt að hræða að minnsta kosti sex aðra vegfarendur. Bæði karlar og konur eru talin hafa orðið fyrir barðinu á honum.
Á upptökum sést maðurinn á einum tímapunkti draga grímuna niður þannig að hluti andlits hans verður sýnilegur. Lögregla lýsir honum sem grönnum svörtum karlmanni, um 173 sentímetra á hæð og á aldrinum 16 til 20 ára.
Lögregla vinnur nú að því að bera kennsl á manninn og hafa uppi á honum. Verði hann handtekinn gæti hann meðal annars átt yfir höfði sér ákærur vegna hótana, áreitni, líkamsárásar og ógnunar.
