Bandaríska OnlyFans-stjarnan Courtney Clenney hefur játað manndráp í tengslum við dauða kærasta síns, Christians Obumseli, árið 2022.

Clenney og saksóknarar komust að samkomulagi um að hún sæti sex ára fangelsisvist. Hún fær þó þann tíma sem hún hefur þegar setið í gæsluvarðhaldi dreginn frá refsingunni, en á mánudag voru nákvæmlega fjögur ár liðin frá því hún var handtekin.

Þegar Clenney verður látin laus verður henni gert að gangast undir meðferð vegna geðheilbrigðis- og vímuefnavanda. Hún verður nú flutt úr Turner Guilford Knight-fangelsinu í ríkisfangelsi í Flórída.

Clenney var handtekin á Hawaii í ágúst 2022 vegna dauða Obumseli. Hann lést eftir að hún stakk hann með hnífi í íbúð þeirra í Miami í apríl sama ár.

Clenney hélt því lengi fram að um sjálfsvörn hafi verið að ræða þegar hún stakk Obumseli. Myndefni úr búkmyndavélum lögreglu sýndi hana blóðuga og handjárnaða eftir atvikið. Á öðru myndskeiði mátti heyra hana í miklu uppnámi spyrja lögreglumenn ítrekað hvort hún hefði orðið Obumseli að bana.