Heildstæðum endurbótum er nú lokið á húsnæði öryggisgeðdeildarinnar C0 á Kleppi, sem er hluti af réttar- og öryggisgeðþjónustu Landspítala. Af því tilefni var nýverið haldið opið hús þar sem fulltrúum heilbrigðisráðuneytisins, Fangelsismálastofnunar, Reykjavíkurborgar og samstarfsaðilum innan spítalans var boðið að kynna sér hina nýju aðstöðu segir á vef Landspítalans.
Nútímaleg hönnun og aukið öryggi
Húsnæðið var endurbyggt frá grunni þar sem innviðir voru endurhannaðir með nútímaleg og örugg sjónarmið að leiðarljósi. Innra skipulag deildarinnar miðar að því að tryggja vistlega umgjörð, öryggi og markvissa endurhæfingu sjúklinga. Á deildinni er rými fyrir átta einstaklinga í einbýli og fylgir sérbaðherbergi og salerni hverju herbergi. Þá hefur verið útbúið sérstakt öryggissvæði fyrir þá sem þurfa tímabundið á auknu eftirliti og umönnun að halda.
Áhersla á bótunaraðstöðu og vellíðan
Mikil áhersla var lögð á bætta bötunaraðstöðu við hönnunina. Deildin er búin nýrri íþróttaaðstöðu og hefur beint aðgengi að rúmgóðu útivistarsvæði. Öll húsgögn í rýmum sjúklinga eru sérhönnuð fyrir krefjandi umhverfi geðheilbrigðisþjónustu, þar sem hugað er sérstaklega að forvörnum gegn skaða og að fólk upplifi almenna vellíðan.
Liður í víðtækri framtíðaruppbyggingu
Opnun C0 deildarinnar markar fyrsta áfangann í stærri uppbyggingu réttar- og öryggisgeðþjónustu Landspítala, en þörf eftir þjónustunni hefur farið vaxandi á undanförnum árum. Áætlað er að opna nýja átta rúma legudeild, C1, í lok ársins 2026. Þegar þeirri uppbyggingu lýkur mun þjónustan ná yfir þrjár legudeildir með samtals 24 legurýmum. Samhliða þessum breytingum er verið að innleiða nýja nálgun í ferliþjónustu þar sem göngudeildarþjónustu er breytt í þverfaglegt samfélagsgeðteymi (FACT-forensic) að erlendri fyrirmynd. Ferliþjónustan mun starfa í þremur sérhæfðum teymum: geðteymi fangelsa, Laufeyjarteyminu og samfélagsgeðþjónustu réttar- og öryggisgeðþjónustu.
