Slúðurbloggarinn og fjölmiðlamaðurinn Perez Hilton hefur verið lagður inn á sjúkrahús eftir að lögregla var kölluð að heimili hans í Miami í kjölfar tilkynninga um að hann hefði skaðað sjálfan sig í beinni útsendingu á TikTok.
Lögreglan í Miami-Dade sagði í yfirlýsingu að henni hefðu borist margar tilkynningar um einstakling sem væri í beinni útsendingu á samfélagsmiðlum þar sem hann virtist fremja sjálfsskaða.
Lögreglumenn fóru þegar á heimili Hilton, þar sem þeir ræddu við fjölskyldumeðlimi sem staðfestu að hann væri einn inni í húsinu.
Síðar tókst lögreglu að ná sambandi við Hilton.
„Viðkomandi náðist heill á húfi og var fluttur af sjúkraflutningamönnum Miami-Dade á sjúkrahús þar sem hann fær nú læknisaðstoð,“ sagði lögreglan í yfirlýsingu til E! News.
Þar kemur jafnframt fram að sérhæfð áfallateymi lögreglu og geðheilbrigðisstarfsfólk hafi verið á vettvangi til að veita fjölskyldu hans stuðning.
Beina útsendingin hefur síðan verið fjarlægð af TikTok. Samkvæmt NBC News virtist Hilton í myndskeiðinu vera blóðugur og halda á því sem leit út fyrir að vera hnífur.
Umboðsmenn biðja um friðhelgi
Umboðsmenn Perez Hilton sögðust fljótlega hafa orðið varir við myndskeiðið sem fór í dreifingu á netinu, en hefðu þá ekki náð sambandi við hann þrátt fyrir ítrekaðar tilraunir.
„Helsta áhyggjuefni okkar er heilsa og velferð Perez, sem og velferð fjölskyldu hans. Þar til við höfum staðfestar upplýsingar munum við ekki velta neinu fyrir okkur eða tjá okkur frekar,“ sögðu þeir í yfirlýsingu.
Þeir þökkuðu jafnframt fólki fyrir stuðninginn og báðu um að friðhelgi Hilton og fjölskyldu hans yrði virt.
Var nýlega alvarlega veikur
Fyrr á þessu ári greindi Perez Hilton, sem á þrjú börn, frá því að hann hefði legið á sjúkrahúsi í 21 dag vegna blóðsýkingar.
Í apríl sagði hann frá því á Instagram að hann hefði einnig greinst með segarek í djúpbláæð eftir að hafa fundið fyrir miklum verk í fæti.
Læknar náðu þó að greina blóðtappann snemma.
„Ég er svo þakklátur Guði að þetta fannst tímanlega. Hefði blóðtappinn farið til lungna eða hjarta hefði það getað farið mjög illa,“ sagði Hilton þá.
Daginn eftir greindi hann frá því að aðgerðin hefði gengið vel og þakkaði heilbrigðisstarfsfólki fyrir meðferðina.
