Norska ríkisolíufélagið Petoro hefur ekki í hyggju að ráðast í frekari rannsóknir á Drekasvæðinu að svo stöddu og virðist áhugi þess á verkefninu vera takmarkaður. Félagið segir rannsóknir sem áður hafa farið fram ekki hafa gefið vísbendingar um að olía finnist þar í teljandi magni.
Þetta kemur fram í svari fyrirtækisins við fyrirspurn Austurfréttar, sem var send í kjölfar fundar Sjálfstæðisflokksins í Fjarðabyggð um olíuleit á svæðinu. Þar var meðal annars rætt um möguleika Drekasvæðisins og framtíð rannsókna á því.
Samkvæmt Austurfrétt setti Heiðar Guðjónsson, fjárfestir og stjórnarformaður Dreka kolvetnis, á fundinum fram fullyrðingar um að Petoro hefði áður haft áhuga á frekari rannsóknum og jafnvel tilraunaborunum árið 2018. Í svari Petoro er þeirri lýsingu hins vegar hafnað.
„Petoro óskaði ekki eftir að hefja boranir árið 2018. Petoro hafði engin áform um frekari rannsóknir á Drekasvæðinu og hefur ekki lýst neinum áformum um frekari þátttöku í þeim,“ segir í svari upplýsingafulltrúa fyrirtækisins.
Einnig hafði verið bent á mögulegan olíuleitarsvæði suðvestan á Drekasvæðinu, en Petoro telur ekki tilefni til bjartsýni þar. „Bæði leyfishafi og Petoro komust að þeirri niðurstöðu að það væru engar líkur á að finna olíu í vinnanlegu magni. […] Fyrir utan þá ákvörðun að halda ekki áfram árið 2018 hefur Petoro ekki mótað sér neina skoðun á möguleikum Drekasvæðisins,“ segir í svarinu.
Petoro tók þátt í rannsóknunum á grundvelli samkomulags milli íslenskra og norskra stjórnvalda. Í því skyni var dótturfélagið Petoro Iceland stofnað, sem síðar var lagt niður árið 2019. Félagið hafði aðkomu að þremur leitarleyfum sem veitt voru á árunum 2013–2014.
Leyfunum var skilað eftir að hljóðbylgjurannsóknum lauk árið 2018. Kínverska fyrirtækið CNOOC var aðalleyfishafi, en bæði það og Petoro töldu að ekki væri að finna olíu í vinnanlegu magni á svæðinu. Við rannsóknirnar naut Petoro einnig tæknilegrar ráðgjafar frá norsku Olíustofnuninni, nú Landgrunnsstofnun Noregs, að því er fram kemur í frétt Austurfréttar.
Þrátt fyrir að á fundinum á Reyðarfirði hafi verið haldið fram að tæknin til borana á svæðinu væri til staðar, telur Petoro að helstu hindranir séu annars eðlis. „Mat Petoro er að jarðfræðin sé helsta áskorunin tæknilega í þessu samhengi.“
Fram kemur að öll frekari þátttaka Petoro í verkefnum á íslensku yfirráðasvæði sé háð ákvörðunum norskra stjórnvalda.
