Matvælastofnun (MAST) varar við aðila sem gekk milli hesthúsa á Eyrarbakka um nýliðna helgi og kynnti sig sem starfsmann stofnunarinnar, þrátt fyrir að hafa engar heimildir til slíks.
Þetta kemur fram í tilkynningu frá Matvælastofnun. Þar segir að stofnuninni hafi borist ábendingar um málið en áréttað er að engir eftirlitsmenn á vegum MAST hafi verið við störf á svæðinu á umræddum tíma.
Stofnunin leggur áherslu á að viðkomandi sé ekki starfsmaður hennar og hafi engar heimildir til að sinna opinberu eftirliti.
Í tilkynningunni kemur fram að atvik sem þetta séu því miður ekki einsdæmi og áður hafi komið upp tilvik þar sem óviðkomandi aðilar hafi gefið sig út fyrir að framkvæma opinbert eftirlit. Af þeim sökum hvetur Matvælastofnun umráðamenn dýra og almenning til að sýna aðgát og vera á varðbergi gagnvart slíkri háttsemi.
MAST minnir jafnframt á hvernig hægt sé að þekkja eftirlitsmenn stofnunarinnar. Eftirlitsmenn klæðast ávallt vinnufatnaði sem er greinilega merktur Matvælastofnun og bera sérstök starfsskírteini með merki stofnunarinnar. Þeim ber ávallt að framvísa skírteinum sínum þegar þess er óskað til að staðfesta hver þeir eru.
Stofnunin hvetur umráðamenn dýra til að hika ekki við að óska eftir að fá að sjá starfsskírteini ef minnsti vafi leikur á því að viðkomandi sé starfsmaður Matvælastofnunar.
Verði fólk vart við einstaklinga sem gefa sig út fyrir að vera starfsmenn Matvælastofnunar án tilskilinna heimilda er það hvatt til að hafa tafarlaust samband við stofnunina. Eftir atvikum sé einnig rétt að tilkynna málið til lögreglu.
