61 árs karlmaður í Oklahoma í Bandaríkjunum hefur verið handtekinn eftir að hafa ráðist að lögreglumönnum með heimatilbúni eldvörpu þegar þeir hugðust afhenda honum tilkynningu um útburð úr íbúð hans.

Atvikið náðist á búkmyndavélar lögreglumanna og sýnir myndskeið frá vettvangi þegar þeir fara inn í íbúð mannsins, Darron Dunn.

Samkvæmt atvikaskýrslu lögreglustjóraembættisins í Oklahoma-sýslu beindi Dunn úðabrúsa að lögreglumönnunum og úðaði úr honum á sama tíma og hann kveikti í efninu með kveikjara. Við það myndaðist eldtunga sem beindist að lögreglumönnunum.

Þegar eldurinn hafði slokknað vaknaði grunur um að sprengibúnaður væri einnig í íbúðinni. Lögreglumenn komu auga á rafgeymi úr bifreið sem tengdur var við víra. Vírarnir lágu í gegnum stofu íbúðarinnar að búnaði sem komið hafði verið fyrir nærri útidyrunum.

Lögreglumennirnir yfirgáfu í kjölfarið íbúðina og kölluðu til sprengjusveit og sérsveit. Sérfræðingum tókst síðar að gera búnaðinn óvirkan án frekari atvika.

Dunn var fluttur á sjúkrahús þar sem hann gekkst undir læknisskoðun áður en hann var handtekinn.

Samkvæmt atvikaskýrslunni hefur Dunn verið ákærður fyrir alvarlega líkamsárás, brot tengt sprengiefnum og fyrir að hindra störf lögreglu.