Demantaleit Jack Pearadin í þjóðgarði í Arkansas í Bandaríkjunum skilaði heldur betur árangri þegar hann fann rúmlega sex karata gulan demant. Steinninn er einn sá eftirtektarverðasti sem fundist hefur á svæðinu.
Pearadin var að leita að verðmætum steinum í Crater of Diamonds State Park þegar hann kom auga á eitthvað óvenjulegt í grjóthrúgu.
„Ég var kominn um átta fet frá hrúgunni en af einhverjum ástæðum sneri ég mér við og sá eitthvað glóa úr miðri henni,“ sagði Pearadin í tilkynningu þjóðgarðsins.
Steinninn reyndist vera 6,03 karata gulur demantur, á stærð við stóran sælgætismola.
Starfsmenn þjóðgarðsins staðfestu síðar þyngd demantsins. Waymon Cox, aðstoðarstjórnandi garðsins, segir steininn einstaklega fallegan. Hann sé mjög samhverfur og með ávalar hliðar. Talið er að hann sé 48 hliða kristall, sem sé fremur sjaldgæft meðal demanta sem finnast á svæðinu.
Crater of Diamonds State Park er sérstakur að því leyti að almenningur getur þar leitað að demöntum og öðrum verðmætum steinum og haldið því sem finnst. Leitarsvæðið er um 37 ekrur að stærð og er á yfirborði gamals eldgígs. Þar fannst einnig stærsti demantur sem vitað er til að hafi fundist í Bandaríkjunum, hinn 40,23 karata „Uncle Sam“.
