Tveir menn létust og níu særðust þegar ökumaður ók bifreið viljandi á hóp fólks í borginni Caen í Normandí í norðurhluta Frakklands seint á miðvikudagskvöld. Franskir fjölmiðlar greina frá því að lögregla hafi handtekið 26 ára rússneskan ríkisborgara af tsjetsjenskum uppruna vegna málsins.
Atvikið átti sér stað fyrir utan bar í grennd við lestarstöðina í Caen. Samkvæmt upplýsingum frá lögreglu hafði komið til átaka skömmu áður og er talið að hinn grunaði hafi lent í átökum við nokkra einstaklinga.
Maðurinn yfirgaf vettvang en sneri skömmu síðar aftur á bifreið. Hann ók inn á akrein fyrir strætisvagna og síðan viljandi á hóp fólks sem stóð við strætisvagnaskýli.
Annar þeirra sem létust var 35 ára afganskur maður. Hinn var 28 ára og er einnig talinn hafa verið afganskur ríkisborgari.
Níu menn á aldrinum 17 til 36 ára særðust í ákeyrslunni og voru sjö þeirra sagðir í lífshættu. Nokkrir hinna særðu hlutu meðal annars beinbrot á neðri útlimum. Meðal fórnarlambanna eru menn af frönskum, egypskum, bangladesskum og súdönskum uppruna.
Ökumaðurinn flúði af vettvangi eftir ákeyrsluna og hófst umfangsmikil leit að honum. Hann var síðar handtekinn í hafnarbænum Ouistreham, skammt frá Caen.
Við yfirheyrslur sagðist maðurinn hafa orðið fyrir ofbeldi við lestarstöðina áður en hann ók á fólkið. Hann var ekki undir áhrifum áfengis þegar atvikið átti sér stað.
Saksóknarar segja ekkert benda til þess að hryðjuverk hafi verið að baki árásinni. Hinn grunaði dvelur löglega í Frakklandi, var ekki á skrá hjá frönskum leyniþjónustuyfirvöldum og hafði ekki áður hlotið refsidóm.
Rannsókn málsins stendur yfir.
