Lína Rut hefur hrundið af stað söfnun til stuðnings æskuvinkonu sinni, Ester Júlíu Olgeirsdóttur, sem glímir við árásargjarnt HER2-jákvætt brjóstakrabbamein og stendur nú frammi fyrir langri og erfiðri meðferð.

Í hjartnæmri Facebook-færslu segir Lína að Ester búi ein í Osló og hafi lítið stuðningsnet þar, fyrir utan hundinn sinn, Esju. Hún hafi verið nýskilin og nýhafin í nýju starfi þegar hún fékk krabbameinsgreininguna.

„Lífið tók algjöra U-beygju,“ skrifar Lína og segir Ester þegar hafa gengið í gegnum erfiða lyfjameðferð, skurðaðgerð og geislameðferð.

Vonir hafi staðið til þess að meðferðinni færi senn að ljúka, en nýlega hafi komið í ljós að hefja þurfi aðra níu mánaða lyfjameðferð.

„Við vorum báðar bjartsýnar og farnar að plana ferð í húsið mitt í Suður-Frakklandi, en því miður þarf Ester að hefja aðra lyfjameðferð þar sem ekki tókst að koma í veg fyrir meinið,“ segir Lína.

Hún bendir jafnframt á að Ester lifi nú á sjúkradagpeningum sem dugi skammt og að íbúðin sem hún leigir hafi verið sett á sölu. Hún þurfi því að flytja út fyrir 1. ágúst, samhliða því að standa straum af nauðsynlegum tannviðgerðum og heimsókn til kjálkaskurðlæknis áður en nýja meðferðin geti hafist.

Samkvæmt Línu hefur norska vinnu- og velferðarstofnunin NAV hafnað beiðni Esterar um fjárhagsaðstoð, þótt hún hyggist halda áfram að leita réttar síns.

Lína segir að öll framlög, stór sem smá, geti skipt sköpum.

„Allt sem tikkar inn léttir henni byrðarnar og gefur henni svigrúm til að einbeita sér að því sem skiptir mestu máli núna – að ná heilsu.“

Hún hvetur jafnframt þá sem ekki geta lagt söfnuninni lið fjárhagslega til að deila færslunni eða senda Ester hvatningarorð.

„Peppið frá ykkur síðast hjálpaði svo mikið. Ester sat með tárvot augu við að lesa kveðjurnar ykkar. Það gaf henni gríðarlegan styrk. Magnað hvað internetið og samheldni getur gert fyrir okkur,“ skrifar Lína Rut.

Hér má sjá reikningsupplýsingar ef fólk vill styrkja Ester:

Ester Júlía Olgeirsdóttir: Kt 281166-4419, reikn. 2200-26-286611