Bandaríski álitsgjafinn og hlaðvarpsstjórnandinn Tucker Carlson heldur því fram að stjórnvöld í Sádi-Arabíu og Katar hafi handtekið ísraelska Mossad-njósnara sem hafi verið að undirbúa sprengjuárásir í löndunum tveimur. Þetta kemur fram í frétt Middle East Eye og er sagt í skugga aukinnar spennu á svæðinu eftir sameiginlegar árásir Bandaríkjanna og Ísraels á Íran.
Í þætti sínum í gær sagði Carlson að Sádi-Arabía og Katar hefðu „handsamað og handtekið ísraelska Mossad-fulltrúa sem ætluðu að fremja sprengjuárásir þar í landi“. Hann dró í efa hvatir Ísraela og spurði: „Af hverju myndu Ísraelar fremja sprengjuárásir í Persaflóaríkjum sem einnig eru undir árásum Írans?“
Hann bætti við: „Eru þau ekki á sama bandi?“
Carlson hélt því ennfremur fram að „Ísrael vilji veikja Íran, og Katar, og Sameinuðu arabísku furstadæmin, og Sádi-Arabíu, og Barein, og Óman og Kúveit“ og fullyrti að Ísrael reyni markvisst að skapa óstöðugleika meðal arabískra bandamanna Washington.
Í febrúar var Carlson og tökulið hans um stundarsakir handtekin af ísraelskum öryggisyfirvöldum í Tel Aviv eftir að hann tók viðtal við sendiherra Bandaríkjanna í Ísrael, Mike Huckabee.
Í viðtalinu sagði Huckabee að gyðingar hefðu „guðlegan rétt“ til að nema land Palestínumanna og hafnaði hugmyndinni um sérstaka palestínska þjóðernisvitund.
Viðtalið fylgdi opinberum deilum þeirra á samfélagsmiðlum, þar sem Carlson gagnrýndi „sjokkerandi“ meðferð Ísraela á kristnum mönnum og sakaði Huckabee um að gera ekki nóg til að vernda kristna sem hefðu orðið fyrir árásum ólöglegra landtökumanna á hernumda Vesturbakkanum og í Jerúsalem.
Árið 2025, eftir heimsókn Carlson til palestínskra flóttamanna frá Gaza í Katar þar sem hann vakti athygli á morðum á börnum, var hann útnefndur „gyðingahatari ársins“ af bandarískum hagsmunasamtökum sem styðja Ísrael. Samtökin vísuðu þar til andstöðu hans við aðgerðir Ísraels á Gaza, sem hann hefur kallað þjóðarmorð.
Ummæli Carlsons koma á sama tíma og hernaðaraðgerðir Bandaríkjanna og Ísraels gegn Íran halda áfram. Í árásunum hafa meðal annars látist æðsti leiðtogi Írans, Ali Khamenei, háttsettir embættismenn og hundruð almennra borgara. Harðasta árásin hingað til var á laugardag þegar yfir hundrað stúlkur létust í loftárás á skóla í suðurhluta Írans.
Íran hefur brugðist við með árásum á bandarískar herstöðvar á svæðinu og raskað mikilvægum olíuflutningaleiðum. Þá hafa þó nokkur flugskeyti hæft skotmörk í Ísrael.
