Verðbólga mældist 5,6 prósent í ágúst og jókst frá fyrri mánuði, í takt við væntingar greinenda. Samkvæmt upplýsingum sem birtar hafa verið á vef Stjórnarráðsins verður hækkun verðbólgu undanfarna tólf mánuði ekki rakin til hækkunar skatta eða gjalda fyrir opinbera þjónustu.
Athygli vekur að Stjórnarráðið skuli birta sérstaka umfjöllun af þessu tagi um einstaka verðbólgumælingu, enda er alls ekki algengt að slíkar tilkynningar séu birtar á vef þess í kjölfar mælinga Hagstofunnar.
Þar kemur fram að þrátt fyrir breytingar á skráningargjöldum opinberra háskóla og aðrar gjaldskrárbreytingar hafi skattar og opinber gjöld haft óveruleg áhrif á verðbólgumælingar að undanförnu.
Mælikvarðar á tólf mánaða verðbólgu, þar sem annars vegar bein áhrif skatta og hins vegar veigamestu liðir opinberrar þjónustu eru undanskildir, séu nú nánast þeir sömu og almenn verðbólga. Munurinn nemi um eða innan við 0,1 prósentustigi.
Þá hafi skattabreytingar í raun vegið til lækkunar verðbólgu frá fjórða ársfjórðungi síðasta árs. Verðbólga án skattaáhrifa hafi hækkað um 0,3 prósentustigum meira en almenn verðbólga á tímabilinu. Það skýrist einkum af tímabundinni lækkun virðisaukaskatts á eldsneyti.
Að mati Stjórnarráðsins má þess í stað rekja aukna verðbólgu að verulegu leyti til tilfallandi eða ytri þátta. Þar vega flugfargjöld sérstaklega þungt, en hækkun þeirra skýrir ein og sér nærri helming þeirrar aukningar sem orðið hefur á verðbólgu frá því hún náði lágmarki undir lok síðasta árs.
„Það þarf samstillt átak til að ná verðbólgu niður og stjórnvöld eru reiðubúin til þess. Það er sameiginlegt verkefni okkar og aðila vinnumarkaðarins að ná niður vöxtum og verðbólgu, og við erum tilbúin í það samtal,“ segir Daði Már Kristófersson fjármála- og efnahagsráðherra.
