Einstakt og afar glæsilegt einbýlishús við Vatnasel 1 í Seljahverfi Reykjavíkur er komið á sölu. Um er að ræða 295,3 fermetra hús á tveimur pöllum með stórum bílskúr, teiknað af arkitektunum Eðvarði Guðmundssyni og Sigurði Kjartanssyni.

Húsið stendur við lokaða götu sem tengist Ystaseli og nýtur einstaklega góðrar staðsetningar í grónu og fjölskylduvænu hverfi. Fasteignin er skráð 228,3 fermetrar að stærð en raunstærð hennar er um 295,3 fermetrar þar sem um 67 fermetrar á neðstu hæð eru óskráðir. Aðalhæðin er 152,5 fermetrar, neðri hæðin 93,4 fermetrar og bílskúrinn 49,4 fermetrar.

Húsið var byggt árið 1979 og hefur samkvæmt upplýsingum úr söluyfirliti fengið gott viðhald í gegnum árin. Það ber þess merki bæði að utan og innan þar sem eignin hefur varðveitt sinn upprunalega sjarma samhliða völdum endurbótum.

Alls eru átta til níu svefnherbergi í húsinu og því hentar eignin vel stórum fjölskyldum. Þá er mögulegt að nýta neðri hæðina sem séríbúð, sem getur skapað aukna tekjumöguleika eða hentað fjölskyldum með fjölskyldumeðlimi á mismunandi aldri.

Eitt helsta aðdráttarafl eignarinnar er rúmgóð stofa með arni og útgengi á stórar vestursvalir. Falleg gluggasetning gefur húsinu sérstakan svip og nýtur það jafnframt útsýnis til fjalla frá stofurýmum og svölum.

Baðherbergi eignarinnar var hannað af Guðbjörgu Magnúsdóttur og eldhúsið var endurnýjað og sérsmíðað árið 2000.

Ásett verð fyrir eignina er 175 milljónir króna.