Það er fátt betra en að koma heim í hreint og vel skipulagt húsnæði. Ýmis algeng mistök við heimilisþrif geta þó dregið verulega úr árangrinum og í sumum tilfellum jafnvel skemmt yfirborð eða skapað hættu fyrir heilsuna.
Fjórir sérfræðingar í þrifum, Alicia Sokolowski hjá AspenClean, Lauren Houser hjá Zep Inc., og Michael Williams hjá Michael’s Cleaning, hafa bent á nokkur atriði sem fólk ætti sérstaklega að varast.
Ekki blanda saman hreinsiefnum
Ein alvarlegastu mistökin er að blanda saman mismunandi hreinsiefnum í þeirri trú að þannig náist betri árangur. Sokolowski segir sérstaklega varasamt að blanda klór við edik, ammoníak eða önnur hreinsiefni. Við slíka blöndun geta myndast hættulegar gufur auk þess sem yfirborð geta skemmst.
Ráðlagt er að nota aðeins eina tegund hreinsiefnis í einu. Ef skipta þarf um efni ætti að skola yfirborðið vandlega með vatni áður.
Fjarlægja þarf ryk og óhreinindi fyrst
Það getur verið freistandi að grípa strax í úðabrúsann en Houser segir mikilvægt að fjarlægja fyrst ryk, mola, hár og önnur laus óhreinindi. Sé hreinsiefni úðað beint á rykugt yfirborð geti einfaldlega myndast óhrein blanda sem er erfiðari viðureignar.
Sama gildir um gólf. Best er að sópa eða ryksuga áður en þau eru skúruð.
Leiðbeiningarnar skipta máli
Williams bendir á að fólk sleppi gjarnan því að lesa leiðbeiningarnar á hreinsiefnum. Það geti bæði leitt til rangrar notkunar og þess að hreinsiefnið skili ekki tilætluðum árangri. Sérstaklega sé mikilvægt að kynna sér viðvaranir og fylgja fyrirmælum framleiðanda.
Ekki þrífa glugga í beinu sólskini
Gluggar og speglar geta orðið rákóttir ef þeir eru þrifnir í beinu sólskini. Ástæðan er sú að hreinsiefnið þornar of hratt á heitu glerinu.
Sokolowski mælir því með að gluggar séu þrifnir snemma morguns, að kvöldi eða þegar þeir eru í skugga. Að lokum sé gott að þurrka glerið með hreinum örtrefjaklút.
Þrifatækin þurfa líka þrif
Óhreinir svampar, tuskur, moppur og ryksugusíur geta hýst bakteríur og myglu og dreift óhreinindum um heimilið.
Houser varar sérstaklega við krossmengun, til dæmis þegar sama tuskan er notuð á salerni og síðar í eldhúsinu. Hún mælir með því að ákveðnir klútar séu eingöngu notaðir í tilteknum rýmum og jafnvel litakóðaðir eftir herbergjum.
Örtrefjaklúta ætti að þvo eftir notkun, skipta reglulega um svampa og hreinsa eða endurnýja síur og moppuhausa eftir þörfum.
Óhreint skúringarvatn dreifir óhreinindunum
Að lokum segir Houser algeng mistök að nota sömu fötuna af sífellt óhreinna vatni til að skúra heilt rými. Með því sé hætta á að óhreinindunum sé einfaldlega dreift aftur yfir gólfið.
Hún mælir með tveggja fötu aðferðinni. Í annarri fötunni sé hreint vatn ásamt hæfilegu magni af gólfhreinsi en hin sé notuð til að skola og vinda moppuna. Með reglulegum vatnsskiptum séu mun meiri líkur á að gólfið verði í raun hreint.
