Alls sóttu sjö um stöðu safnstjóra Listasafns Reykjavíkur sem auglýst var á dögunum en greint er frá því í tilkynningu frá Reykjavíkurborg. Einn umsækjandi dró umsókn sína til baka.
Umsækjendur um stöðuna eru:
Alma Dís Kristinsdóttir, safnstjóri og doktor í safnafræði
Anne Herzog, list- og verkgreinakennari
Björg Erlingsdóttir, fyrrverandi sveitarstjóri
Ingi Rafn Sigurðsson, framkvæmdastjóri
Kári Finnsson, forstöðumaður
Markús Þór Andrésson, deildarstjóri sýninga og miðlunar
Listasafn Reykjavíkur hýsir þrjú megin söfn í þremur sýningarhúsum; safn Ásmundar Sveinssonar í Ásmundarsafni, safn Jóhannesar Kjarvals á Kjarvalsstöðum og safn verka Erró í Hafnarhúsi. Safnið skal einnig safna, skrá, varðveita og sýna eins fullkomið safn íslenskrar myndlistar sem unnt er; rannsaka og sinna fræðslu um myndlist m.a. með fjölbreyttu sýningarhaldi, fyrirlestrum, leiðsögn, útgáfustarfsemi og útlánum verka. Þannig stuðli safnið að því að borgarbúum og öðrum gestum safnsins sé gert kleift að fylgjast með helstu straumum og stefnum í myndlist innanlands og á alþjóðavettvangi.
Listasafn Reykjavíkur hefur jafnframt umsjón með myndverkum á almannafæri í eigu borgarinnar.
