Tónlistargagnrýnandinn og píanókennarinn Jónas Kwei Ting Sen hefur ítrekað verið til umræðu í samfélaginu en hann hefur í gegnum árin verið einn beittasti gagnrýnandi landsins og hefur hlotið bæði níð og lof fyrir skrif sín.
Jónas sýnir þó aðra hlið á sér í ítarlegu viðtali við Heimildina en þar ræðir hann meðal annars þá staðreynd að hann missti eiginkonu sína í bílslysi þegar hann var aðeins 26 ára gamall.
„Hún hafði lent í alvarlegu slysi nokkrum mánuðum áður en við fórum að vera saman. Hún hafði verið á neðanjarðarlestarstöð í London og stóð eiginlega við opið þar sem lestin kom inn. Hún heyrði að lestin var að koma og beygði sig til að ná í töskuna sína. Lestin skall á höfuðið á henni þegar hún kom. Henni var ekki hugað líf og það var kraftaverk að hún náði sér.
Það er ekki vitað hvað gerðist í bílslysinu. Opinbera útgáfan er að hún hafi misst stjórn á bílnum í beygju en hún var ekki í belti og kastaðist út úr bílnum. En þetta var engin sérstök beygja. Það var eins og hún hafi fengið aðsvif þegar hún var að keyra og gæti það verið hugsanlega afleiðingar slyssins sem hún lenti í áður. Maður veit það ekki,“ segir Jónas við Heimildina en slysið átti sér stað árið 1989.
„Við vorum mjög ástfangin.“
Jónas segir að hann hafi ekki leitað sér hjálpar þegar hann þurfti mest á henni að halda og að það hafi haft alvarleg áhrif á líf hans um árabil. Í viðtalinu lýsir hann því hvernig hann hafi þróað með sér mikla óreglu eftir fráfall Margrétar og glímt við bæði áfengis- og lyfjamisnotkun.
