Sjálfkeyrandi strætisvagn lenti í árekstri við sporvagn á fyrsta degi sínum með farþega um borð í sænsku borginni Gautaborg í dag. Þetta staðfesti almenningssamgöngufyrirtækið Västtrafik í samtali við AFP-fréttastofuna.

Samkvæmt upplýsingum frá fyrirtækinu stöðvaði sjálfkeyrandi vagninn skyndilega í miðborginni og sporvagn keyrði aftan á hann í kjölfarið. Engin slys urðu á fólki.

Talsmaður Västtrafik, Patrik Chi, sagði að vagninn hefði þegar verið tekinn úr umferð til skoðunar eftir áreksturinn. Hann bætti við að öryggisráðstafanir hefðu verið virkar allan tímann og að ökumaður hefði verið um borð til að geta tekið yfir stjórn ökutækisins ef þörf krefði.

Sjálfkeyrandi vagninn hafði verið í reynsluakstri í miðborg Gautaborgar frá lokum marsmánaðar, en mánudagurinn markaði fyrsta daginn sem hann flutti farþega. Verkefnið er hluti af tilraunaverkefni sem sænska samgöngustofnunin hefur heimilað til 31. júlí árið 2027.

Sjálfkeyrandi almenningsvagnar hafa á undanförnum árum verið prófaðar víða um Evrópu, en slíkur akstur er enn háður sértækum leyfum frá hverju sveitarfélagi og fyrir hverja leið fyrir sig. Evrópusambandið hefur enn ekki samþykkt reglur sem heimila almenna notkun sjálfkeyrandi almenningssamgangna eða svokallaðra „robotaxa“ í atvinnuskyni.