Lögreglan hafði í nógu að snúast í gærkvöldi og í nótt vegna fjölbreyttra verkefna, meðal annars vegna ránsmáls, umferðarslysa og ölvunaraksturs.
Tilkynnt var um rán þar sem árásaraðili hótaði öðrum einstaklingi með eggvopni. Engin slys urðu á fólki en málið er til rannsóknar hjá lögreglu.
Einnig var tilkynnt um ógnandi einstakling í miðborginni. Maðurinn var síðar um nóttina handtekinn þar sem hann var grunaður um innbrot í íbúðarhúsnæði. Þá var ölvuðum einstaklingi ekið heim eftir að hafa valdið ónæði og öðrum óvelkomnum gesti vísað af veitingastað.
Nokkrir ökumenn voru stöðvaðir í umferðareftirliti og reyndust undir áhrifum áfengis. Einn þeirra var jafnframt grunaður um akstur undir áhrifum fíkniefna auk vörslu fíkniefna. Annar ökumaður var grunaður um að aka ítrekað sviptur ökuréttindum. Allir voru látnir lausir að lokinni blóðsýnatöku.
Þá var ökumaður stöðvaður eftir að hafa mælst á 65 kílómetra hraða á klukkustund þar sem hámarkshraði er 30 kílómetrar á klukkustund. Var hann sviptur ökuréttindum til bráðabirgða.
Tvö umferðarslys voru tilkynnt á vaktinni. Í öðru þeirra var bifhjóli ekið á vegrið og var einn einstaklingur fluttur með sjúkrabifreið til frekari skoðunar. Í hinu missti ökumaður rafhlaupahjóls stjórn á tækinu og var einnig fluttur á sjúkrahús til aðhlynningar.
Loks var ölvaður ökumaður handtekinn grunaður um að hafa valdið umferðaróhappi. Engin slys urðu á fólki en maðurinn var vistaður í fangaklefa í þágu rannsóknar málsins.
Við eftirlit með hópi ungmenna varð lögregla einnig vör við ungmenni sem hrækti ítrekað á lögreglubifreið. Haft verður samband við forráðamenn þess og barnaverndaryfirvöld látin vita af atvikinu.
