Evrópskir þingmenn þrýstu á þriðjudag á að flugfélögum yrði bannað að rukka farþega fyrir lítinn handfarangur, en flugiðnaðurinn mótmælir harðlega.

Samgöngunefnd Evrópuþingsins samþykkti tillögu sem myndi leyfa ferðamönnum að taka með sér lítinn hlut til persónulegra nota, svo sem handtösku eða bakpoka, ásamt handfarangri allt að sjö kíló að þyngd, án aukagjalds.

Markmiðið aðgerðarinnar var að spara farþegum „óréttmætan aukakostnað“, sagði Matteo Ricci, þingmaður úr miðju-vinstri flokki og aðalflutningsmaður frumvarpsins.

Mörg lágfargjaldaflugfélög leyfa aðeins einn lítinn hlut til persónulegra nota með keyptum flugmiða, og rukka aukalega fyrir annan handfarangur.

Flugfélög Evrópu (A4E), hagsmunasamtök í greininni, fordæmdu tillöguna og sögðu að hún myndi leiða til hærri fargjalda og aukins kostnaðar fyrir þau sem ferðast með léttan farangur.

„Að þvinga fram innifalinn handfarangur… skyldar farþega til að greiða fyrir þjónustu sem þeir vilja kannski ekki né þurfa“ sagði Ourania Georgoutsakou, framkvæmdastjóri A4E, fyrir atkvæðagreiðsluna.

Aðgerðin, sem myndi ná til allra fluga sem fara eða koma innan ríkja Evrópusambandsins og EES, var samþykkt sem hluti af pakka breytingatillagna að reglugerðum um réttindi farþega sem framkvæmdastjórn ESB lagði fram.

Samgöngunefndin samþykkti einnig að innleiða sameiginlegt eyðublað fyrir beiðnir um bætur og endurgreiðslur, ásamt skilgreindum lista yfir óvenjulegar aðstæður, svo sem náttúruhamfarir eða stríð, þar sem flugfélögum er heimilt að neita um slíkar bætur.

Tillögurnar þurfa næst að fara í atkvæðagreiðslu hjá þinginu.

Búist er við breytingum þar sem tillögurnar þurfa að vera samræmdar og samþykktar af öllum aðildarríkjum áður en þær geta tekið gildi.