Félagið Ísland-Palestína hefur boðað til skyndimótmæla við ríkisstjórnarfund, á morgun 6. maí.
Í ljósi þess að Ísrael hafi tilkynnt um áætlanir sínar um innlimun Gaza og að ríkisstjórn Benjamins Netanyahu hafi ákveðið að kalla til tugþúsundir varaliðshermanna fyrir komandi voðaverk, hefur Félagið Ísland-Palestína boðað til skyndimótmæla á morgun klukkan 8:45, á Hverfisgötu 4, þar sem ríkisstjórnin mun funda. Á mótmælunum verður þess krafist að Þorgerður Katrín Gunnarsdóttir utanríkisráðherra bregðist við nýjustu vendingum þjóðarmorðsins sem Ísraelar eru að fremja.
Segir í texta félagsins í viðburðarlýsingu mótmælanna á Facebook að nú sé kominn tími á að hætta að tala og nú þurfi að láta verkin tala og „grípa til alvöru aðgerða“.
Hér má sjá viðburðarlýsinguna í heild sinni:
„Ísrael hefur tilkynnt um áætlanir sínar um að innlima Gaza og kallað til tugþúsundir varaliðshermanna. Tíminn er á þrotum til að stöðva þjóðernishreinsanir og verstu stríðsglæpi samtímans. Við mótmælum því fyrir utan ríkisstjórnarfund þriðjudaginn 6.maí kl 8:45 og hvetjum almenning til að senda póst á utanríkisráðherra og krefjast þess að brugðist sé við!
Haft var eftir Þorgerði Katrínu í vikunni að Ísland muni “grípa öll þau tækifæri og nota öll þau tækifæri sem að geta leitt til þess að Ísraelar sjái að sér og hleypi að neyðaraðstoð á þetta erfiða svæði.“ Við krefjumst þess að staðið sé við þessi orð og gripið til aðgerða. Ræður og yfirlýsingar skipta Ísrael engu. Ef stjórnvöld vilja raunverulega leggja sitt á vogarskálarnar til að stöðva helför Ísraels í Palestínu verða þau að grípa til alvöru aðgerða líkt og þau hafa lofað:
- Fordæma með öllum ráðum aðgerðir Ísraela sem er ekkert nema helför gegn fólkinu á Gaza, sem sveltur undir sprengjuregni og á nú að ráðast á að auki til að flýta þjóðernishreinsunum
- Tala opinberlega fyrir alþjóðlegu viðskipta- og vopnasölubanni á hendur Ísrael þar til hernáminu í Palestínu lýkur. Án stöðugra vopnasendinga frá Bandaríkjunum, Bretlandi, Þýskalandi og öðrum NATÓ löndum hefði Ísrael þurft að stöðva árásir sínar á Gaza í október 2023.
- Berjast fyrir því að hjálpargögn komist inn á Gaza. Þar ríkir hungursneyð og börn og fullorðnir eru vannærð og svelta. Allar þvingunaraðgerðir gagnvart Ísrael eru réttlætanlegar við þessar aðstæður til að koma hjálpargögnum inn á Gaza.
- Tala fyrir því á alþjóðavettvangi að Ísrael verði einangrað á alþjóðavettvangi þar til hernáminu og stríðsglæpunum lýkur.
- Styðja formlega kæru Suður-Afríku fyrir Alþjóðadómstólnum á hendur Ísraelsríkis fyrir brot á sáttmála SÞ gegn þjóðarmorði.
RÍKISSTJÓRN ÍSLANDS ÞARF AÐ GRÍPA TIL ÞEIRRA AÐGERÐA SEM HÚN HEFUR LOFAÐ - STRAX. GAZA GEFST EKKI UPP - VIÐ GEFUMST EKKI UPP!“
