Fimm meðlimir sómölskrar fjölskyldu létust í eldsvoða sem talinn er hafa kviknað af mannavöldum í fjölbýlishúsi í Vantaa, norður af Helsinki, snemma í morgun. Sjötti fjölskyldumeðlimurinn, ungbarn, lifði brunann af og var fluttur á sjúkrahús.

Lögregla hefur handtekið 70 ára karlmann sem bjó í húsinu, grunaðan um að hafa kveikt eldinn. Ekki liggur fyrir hver ástæða verknaðarins var.

Samkvæmt upplýsingum frá lögreglu fundust fimm látnir í stigagangi hússins um klukkan 6:30 að morgni. Þar af voru tveir fullorðnir og þrjú börn. Hinir fullorðnu voru á þrítugs- og fertugsaldri en börnin þriggja, sex og átta ára.

Rannsókn málsins er á frumstigi, en að sögn lögreglu virðist fjölskyldan ekki hafa verið sérstaklega skotmark árásarinnar og hefur kynþáttahatur verið útilokað sem möguleg ástæða.

Talið er að þau hafi orðið innikróuð í stigaganginum vegna afar mikils reyks sem fyllti hann á skömmum tíma.

Málið er í rannsókn hjá lögreglu.