Staðgöngumóðirin McKenna West segist reiðubúin að fara með deilu sína um forræði yfir barni, sem hún gekk með fyrir par í Kaliforníu, alla leið fyrir Hæstarétt Bandaríkjanna. Dómstóll í Kaliforníu hefur úrskurðað að líffræðilegir foreldrar barnsins fari með forræði þess.
Lincoln Wilson, lögmaður West, segir í samtali við New York Post að skjólstæðingur sinn ætli að láta reyna á gildi úrskurðarins. West fæddi barnið í Texas og telur lögmaður hennar að samkvæmt lögum ríkisins eigi hún að teljast móðir barnsins.
„Við förum með málið fyrir Hæstarétt Bandaríkjanna ef þess þarf,“ sagði Wilson. Hann telur að verði úrskurður dómstólsins í Kaliforníu felldur úr gildi muni West teljast móðir barnsins samkvæmt lögum Texas.
Deilan á rætur að rekja til staðgöngumæðrasamnings sem West gerði við parið í Kaliforníu. Í samningnum var meðal annars ákvæði sem heimilaði líffræðilegu foreldrunum að óska eftir því að meðgöngu yrði slitið ef alvarlegt frávik kæmi í ljós hjá fóstrinu.
Á meðgöngunni greindist barnið með hypoplastic left heart syndrome, alvarlegan meðfæddan hjartagalla þar sem vinstri hluti hjartans er vanþroskaður. Líffræðilegu foreldrarnir vildu að meðgöngunni yrði slitið en West neitaði. Hún hélt þess í stað til Texas þar sem hún fæddi drenginn.
Málið hefur síðan þróast í umfangsmikla lagadeilu milli West og líffræðilegra foreldra barnsins.
Dómstóll hefur nú gefið út tímabundið nálgunar- og bannúrskurð gegn West. Samkvæmt honum er henni óheimilt að taka læknisfræðilegar ákvarðanir fyrir hönd drengsins, taka hann í sína vörslu eða halda því fram að hún sé foreldri hans eða forráðamaður.
Henni er jafnframt óheimilt að fjarlægja barnið af sjúkrahúsi eða hindra aðgang líffræðilegu foreldranna að því.
Úrskurðurinn gildir að minnsta kosti til 25. ágúst, en West hefur verið gert að mæta fyrir dómstól í Dallas þann dag. Þar verður næsti kafli deilunnar um forræði og lagalega stöðu barnsins tekinn fyrir.
