Svandís Svavarsdóttir, fyrrverandi formaður Vinstri grænna og fyrrverandi ráðherra, hefur tekið að sér ritstjórn Breiðfirðings, árlegs tímarits Breiðfirðingafélagsins.

Svandís sagði frá nýja starfinu í Facebook-hópnum „Íbúar Stykkishólms og nágrennis“ í gær. Þar kom fram að undirbúningur að næsta tölublaði væri þegar hafinn og óskaði hún eftir framlagi frá fólki á Breiðafjarðarsvæðinu.

Meðal þess sem Svandís hyggst fjalla um í næsta hefti er almyrkvinn sem gekk yfir 12. ágúst. Ætlunin er að setja saman stutta grein, ríkulega myndskreytta, þar sem upplifun fólks víðs vegar umhverfis Breiðafjörð af þessum sérstæða atburði verður í forgrunni. Hún leitar því eftir frásögnum og ljósmyndum frá þeim sem fylgdust með myrkvanum á svæðinu.

Svandís lét af störfum í stjórnmálum fyrr á árinu eftir meira en tvo áratugi á þeim vettvangi. Hún var borgarfulltrúi í Reykjavík í þrjú ár og sat á Alþingi í fimmtán ár. Þá gegndi hún ráðherraembættum í samtals um ellefu ár og sat í ríkisstjórnum þriggja forsætisráðherra.