Þýskur maður af írönskum ættum hefur verið handtekinn, grunaður um að hafa þvingað viðkvæm ungmenni á netinu til að framkvæma kynferðislegar athafnir og sjálfsskaða, þar sem eitt fórnarlamb svipti sig lífi, að sögn yfirvalda í dag
Tuttugu ára gamli maðurinn var handtekinn í Hamborg í dag, grunaður um glæpi þar á meðal morð og morðtilraun, að undangenginni umfangsmikilli rannsókn, samkvæmt yfirlýsingu frá lögreglu og saksóknurum í norðurhluta Þýskalands.
Hann er sakaður um alls 120 brot og veit lögreglan af minnsta kosti átta börnum og unglingum sem eru sögð vera fórnarlömb mannsins. Maðurinn, sem hefur ekki verið nafngreindur, er grunaður um að hafa beint athygli sinni að fórnarlömbum á netinu á árunum 2021 til 2023.
„Hann er sagður hafa beitt sérstaklega viðkvæm fórnarlömb á samfélagsmiðlum tilfinningalegri stjórnun í þeim tilgangi að nýta traustið sem hann hafði byggt upp í glæpsamlegum tilgangi,“ segir í yfirlýsingu yfirvalda.
Þetta fól í sér að þvinga fórnarlömbin til að framkvæma kynferðislegar athafnir og sjálfsskaða í beinum útsendingum á meðan aðrir notendur fylgdust með. Hann er sagður hafa hótað að dreifa upptökum nema fórnarlömbin samþykktu að framkvæma enn öfgakenndari athafnir.
Í einu tilfelli er hann sakaður um að hafa haft áhrif á 13 ára dreng til að svipta sig lífi. Fréttir herma að drengurinn hafi búið í Bandaríkjunum. Bandaríska alríkislögreglan hafi þá komið rannsókninni í Þýskalandi af stað með því að láta yfirvöld vita.
Í þessari grein er fjallað um sjálfsvíg
Fólki með sjálfsvígshugsanir er bent á upplýsingasíma heilsugæslunnar s.1700, netspjallið heilsuvera.is, Hjálparsíma Rauða krossins s.1717, á netspjallið 1717.is og á Píeta símann s.552-2218. Þau sem misst hafa ástvin í sjálfsvígi er bent á stuðning í Sorgarmiðstöð s. 551-4141, upplýsingasíma heilsugæslunnar s.1700, netspjallið heilsuvera.is og á Píeta símann s.552-2218.
