„Vonir um vopnahlé“ eru „eins og hálmstrá“ segir læknirinn og mannvinurinn Sveinn Rúnar Hauksson og bætir því við að í dag, þann „7.7.2025, ferðast stríðsglæpaforinginn Netanyahu til Washington að heimsækja helsta stuðningsmann sinn, Donald Trump í Hvíta húsinu.“
Giskar Sveinn Rúnar á það að „Netanyahu“ verði „áreiðanlega ekki handtekinn við komuna, þrátt fyrir að vera eftirlýstur af Alþjóða stríðsglæpadómstólnum“ enda eru „Bandaríkin ekki með í þeirri mikilvægu stofnun.“
Sveinn Rúnar færir í tal að „enn einu sinni vekja fjölmiðlar vonir um vopnahlé á Gaza, en fremur ósennilegt er það henti Netanyahu, að hætta fjöldamorðum og gereyðingu palestínskra byggða“ en segir þó að ekki sé loku „fyrir það skotið að Bibi [Benjamin Netanyahu, innskot blm] geri það sem vinargreiða við besta vin sinn að gera dálítið hlé á tortímingunni, og hleypa inn svolitlu af vatni, mat og lyfjum til tveggja milljóna sveltandi íbúa. Bara smá hlé. Það gæti litið út einsog rós í hnappagatið á vininum. Trump er mikið fyrir svoleiðis.“
Hann segir að „við sem í 21 mánuði höfum sofnað á hverju kvöldi út frá hryllingnum sem á sér stað í Palestínu af völdum Ísraels, Bandaríkjanna og helstu bandalagsþjóða þeirra í NATO og vöknum upp við sama hrylling að morgni, við grípum í hvaða hálmstrá sem er“ og nefnir að „við þurfum að trúa því og geta vonað að einhvern tíma muni þessu linna. Og sem allra allra fyrst, helst í gær.“
Sveinn Rúnar talar tæpitunglaust og segir einfaldlega:
„Þjóðarmorð heitir það og þjóðarmorð er það. Nú þegar hafa nærri 60 þúsund manns verið myrt af Ísraelsher og tvöfaldur sá fjöldi örkumla og rúmlega það af völdum árásanna. Þá eru ekki talin þær þúsundir sem liggja undir rústunum.“
Sveinn Rúnar segir aðheimili fólks, sjúkrahús og skólar“ hafi verið sérstök „skotmörk Ísraelshers og í engu stríði hafa jafn margir læknar, hjúkrunarfólk, sjúkraflutningamenn og annað heilbrigðisstarfsfólk verið myrt. Það sama á við um blaðamenn og fréttafólk.“
Að mati Sveins Rúnars hafa átökin á Gaza verið stríð gegn börnum og konum:
„Um það bil þrír af hverjum fjórum sem Ísraelsher hefur drepið eru konur og börn“ og þetta er ekki á neinn hátt „venjulegt stríð, heldur útrýmingarherferð“ en bætir því svo við að það sé „varla hægt að tala um stríð í þessu sambandi. Það á við þegar tvo ríki eða fleiri og tveir herir eða fleiri takast á, einsog til dæmis í Úkraínu. En í Palestínu er enginn her sem verst innrásum, hernámi og linnulausum árásum Ísraelshers, eins best útbúna og öfugasta hers í heimi. Svo ekki sé talað um leyniþjónustu og njósnanet sem gerir hryðjuverkahernum kleift að fylgjast með hverjum einum íbúa, ekki síst leiðtogum fólksins og taka þá af lífi, gjarnan í faðmi fjölskyldunnar sem er þá myrt í heilu lagi. Nei, hér er einn her að verki, Ísraelsher, og verkefni hans á Gaza og í vaxandi mæli einnig á Vesturbakkanum, er útrýmingarherferð.“
Sveinn Rúnar færir í tal að herferðin muni halda áfram af „sívaxandi grimmd“ og að „mótmæli skipta máli“ en að þau dugi því miður ekki ekki til.
Hann segir að „sjaldan hafa sést önnur eins mótmæli og eiga sér stað um allan heim. Þjóðarleiðtogar þeirra ríkja sem eru samsek í þjóðarmorðinu í Palestínu eru farnir að gera sér grein fyrir því að þeir lenda öfugu megin í mannkynsögunni. Frá þeim eru farin að heyrast mótmæli við framferði Ísraelsríkis“ en segir einnig að því miður hafi ekkert þó ekkert breyst og enn „er haldið áfram að senda vopn til Ísraels, ekki bara frá Bandaríkjunum, líka frá Bretlandi og fleirum.“
Sveinn Rúnar segir að „Netanyahu fyrirgefur þessu stuðningsliði sínu stöku harðorðar yfirlýsingar á meðan stefnan og stuðningurinn heldur áfram. Yfirlýsingar hafa einnig komið frá okkar stjórnvöldum og jafnvel talað um þjóðarmorð“ en Sveinn Rúnar segir þó að þessu hafi „ekki verið fylgt eftir með aðgerðum, sem fundið er fyrir. Það þarf sniðgöngu, viðskiptabann og stjórnmálaslit.“
Hann segir að endingu að „við viljum ekki þurfa að standa reikningsskil á því, hvers vegna við gerðum ekki allt sem við gátum til að stöðva þjóðarmorð í Palestínu. Þetta má ekki halda svona áfram.“
Komment